Xitayning "Shinjangning emgek, ishqa orunlashturush kapaliti" namliq aq tashliq kitabi mejburiy emgekning ispati, dep qaralmaqta

Muxbirimiz irade
2020-09-17
Élxet
Pikir
Share
Print

Xitay dölet ishlar kabinétining axbarat ishxanisi 17-séntebir küni "Shinjangning emgek, ishqa orunlashturush kapaliti" namliq bir aq tashliq kitab élan qildi. Bu kitab del amérika hökümiti we yawropadiki bir qisim döletler xitay hökümitini Uyghurlarni qul emgikige sélish bilen eyiblep tedbir qolliniwatqan mezgilde élan qilinishi diqqet qozghidi.

Mezkur aq tashliq kitabta munular déyilgen: "Shinjang ishqa orunlashturush boyiche terbiyelesh salmiqini dawamliq ashurup, ishqa orunlashturush yollirini pa'al kéngeytti. 2014-Yilidin 2019-yilighiche shinjangda her yili ottura hésab bilen 1 milyon 300 minggha yéqin ishchi 'kespiy terbiyelesh' ke qatnashturuldi, yézilardiki éshincha emgek küchliri yiligha ottura hésab bilen 2 milyon 763 ming adem (qétim) din artuq yötkep ishqa orunlashturuldi."

Chet'ellerdiki közetküchiler bolsa bu kitab arqiliq xitayning lagérlargha solan'ghan kishilerning sanini öz éghzi bilen étirap qilghanliqini bildürgen. "Jenubiy xitay etigenlik géziti" ning bu heqtiki xewiride xitaydiki ismini ashkarilimighan bir tetqiqatchini we teywenlik bir mutexesssini ziyaret qilghan bolup, ular her ikkisi yuqiriqi reqemlerning lagérlargha qamalghanlarning sani heqqide chet'ellerdiki mutexessisler dewatqan reqemge intayin mas kélidighanliqini bildürgen.

Amérikadiki tetqiqatchi adriyan zénizmu bu heqte tiwittérde mexsus inkas qayturdi. U aq tashliq kitabidiki reqemlerni mejburiy emgekke zorliniwatqanlargha a'it sanliq melumatni eks ettüridu, dep qaraydighanliqini tekitlidi.

Xitay da'iriliri yuqiriqi bu aq tashliq kitabida yene Uyghur élide emgekchilerning asasiy hoquq-menpe'etige kapaletlik qilin'ghanliqini, ularning barawer heq élish, dem élish, diniy étiqad erkinliki we öz millitining til-yéziqini qollinish qatarliq hoquqlirigha heqiqiy kapaletlik qilin'ghanliqini ilgiri sürgen bolup, tetqiqatchilar xitay hökümitining bu doklatni amérika dölet mejliside körülüwatqan "Uyghur mejburiy emgikige qarshi turush qanun layihesi" ge qarshi chiqarghanliqini perez qilishmaqtiken.

Toluq bet