B d t ning soda we kishilik hoquq yighinida xitayning dölet hamiyliqidiki Uyghur mejburiy emgiki otturigha qoyuldi

B d t ning 13-nöwetlik yilliq soda we kishilik hoquq yighinida xitay hökümitining Uyghurlargha yürgüzüp kéliwatqan dölet hamiyliqidiki mejburiy emgikini bir terep qilishta qandaq tirishchanliq körsitiliwatqanliqi soralghan. B d t tori téléwiziye qanilining neq meydan tarqitishidin melum bolushiche, 25-noyabirdin 27-noyabirghiche dawamlishidighan yighinning tunji künidiki doklat bérish we so'al-jawab qismida, xitayning yéshil énérgiye sana'iti saheside keng mewjut bolghan dölet hamiyliqidiki Uyghur mejburiy emgiki otturigha qoyulghan. B d t ning jenwede ötküzülüwatqan bu qétimliq yighinigha “Kommunizm qurbanliri xatire fondi” ning ali tetqiqatchisi adriyan zénz, amérika ana weten xewpsizliki ministirliqining mejburiy emgek mesililiri boyiche aliy meslihetchisi lawra murfége oxshash Uyghur mejburiy emgiki tetqiqati sahesidiki nopuzluq mutexessisler qatnishiwatqanliqi melum.

Adriyan zénzning ötken hepte X ta élan qilghan uchuridin, uning bu qétimliq yighinda Uyghur mejburiy emgikidin doklat béridighanliqi melum bolghanidi.

Amérika Uyghur birleshmisining re'isi elfidar iltebir 25-noyabirdiki yighinda qilghan sözide, meblegh salghuchilarning dölet hamiyliqidiki Uyghur mejburiy emgikini bir terep qilishta qandaq hoshyarliq körsitiwatqanliqini sorap, buning küntaxta we bashqa yéshil énérgiye téxnikisi teminlesh zenjirige taqilidighanliqini eskertken.

Nöwette, b d t ning bu qétimliq yighinigha Uyghur teshkilatliridin amérika Uyghur birleshmisi, Uyghur herikiti teshkilati we Uyghur kishilik hoquq qurulushining wekilliri qatnashmaqta. Bu nöwetlik b d t yighini xitayning “Uyghur emgek küchlirini yötkesh arqiliq namratliqtin qutquzush pirogrammisi” ning üzlüksiz kéngiyiwatqanliqi qeyt qiliniwatqan bir peytte ötküzülgen. Tetqiqatchi adriyan zénzning ötken hepte X ta élan qilghan uchurida körsitishiche, nöwette xitayning Uyghur rayonidiki “Emgek küchlirini yötkesh arqiliq namratliqtin qutquzush pirogrammisi” dawamliq kéngiyip, “Shinjangning asasliq mejburiy emgek sistémisi” gha aylan'ghan.