Уйғур дияридики мәҗбурий әмгәк түпәйлидин Zara ширкитиниң фирансийәдә дукан кеңәйтиши чәклимигә учриди

Мухбиримиз әзиз
2021-11-30
Share

Дуня зибузиннәт вә кийим-кечәк содисидики байрақдар ширкәтләрниң бири болған Zara ширкити фирансийәдә өзиниң парчә сетиш дуканлирини кеңәйтмәкчи болуватқанда фирансийә даирилири "мәзкур ширкәт уйғурларни мәҗбурий әмгәккә селиш қилмишидин мәнпәәтдар болған болуши еһтималға бәк йеқин" дегән сәвәб билән бу тәләпни тохтитип қойған.

Фирансийә хәвәр агентлиқиниң 29-ноябирдики хәвиридә ейтилишичә, баш ширкити испанийәдики Zara ширкити дәсләп фирансийәниң җәнубидики боду шәһиригә җайлашқан дукан көлимини бир һәссә кеңәйтмәкчи болған. Әмма бу тәләп районлуқ комитетқа тапшурулғандин кейин комитет әзалири бу ширкәтниң уйғур дияридики мәҗбурий әмгәк қилмишиға бағлинишлиқ икәнликини байқап бу тәләпни рәт қилған. Комитет әзалиридин алан гарнер бу һәқтә сөз қилип "Zara ширкити шинҗаңдики мәҗбурий әмгәккә четилип қалған. Өзиниң тәминләш зәнҗиригә өзи игә болалмиған бундақ ширкәтниң дукан кеңәйтиш тәлипини рәт қилдуқ. Биз бу арқилиқ һәрқайси тәрәпкә бир күчлүк учурни йоллимақтимиз" дегән.

Хәвәрдә ейтилишичә, уйғур дияридики пахта мәһсулатлири нөвәттики мәҗбурий әмгәккә бағлинишлиқ әң чоң амилларниң бири болуп, бу ширкәтниң көплигән кийим-кечәклири ашу хилдики пахта мәһсулатлирини ишләткәникән.

Мәлум болушичә, мушу хилдики мәҗбурий әмгәккә бағлинишлиқ бир қисим хәлқаралиқ даңлиқ маркилар йеқиндин буян арқиму арқидин мушу йосундики чәкләш вә тәнқидләргә дуч кәлмәктикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт