“Nikkéy asiya” Uyghur mejburiy emgikide teyyarlan'ghan teyyar béliqlarning yaponiye bazirida sétiliwatqanliqini ashkarilidi

Yaponiyening “Nikkéy asiya” zhurnili tekshürüsh élip bérip, tor baziri arqiliq yaponiyede sétiliwatqan erzan bahaliq teyyar alyaska rok béliqining shendungdiki xitay déngiz mehsulatliri shirkitide teyyarlinidighanliqi we bu shirkette poskamliq Uyghur mejburiy emgek küchlirining ishleydighanliqini ashkarilighan.

“Nikkéy asiya” ning bildürüshiche, tor baziri arqiliq sétiliwatqan teyyar alyaska rok béliqi bahasining intayin erzan bolushi, “Nikkéy asiya” ning tekshürüsh élip bérishigha türtke bolghan. Halbuki, amérikani baza qilghan “Qanunsiz okyan qurulushi” namliq teshkilatning 2023-yili 10-ayda élan qilghan doklati, alyaska rok béliqining kélish menbesige bolghan qiziqishini qozghighan. “Qanunsiz okyan qurulushi” doklatida, xitayning shendong ölkisini öz ichige alghan déngiz boyi ölkiliridiki su mehsulatliri shirketliride Uyghur mejburiy emgek küchlirining ishleydighanliqini élan qilghanidi.

“Nikkéy asiya” ning bildürüshiche, ular tekshürüsh arqiliq shendungdiki xitay déngiz mehsulatliri shirkitining teyyar déngiz mehsulatlirini yaponiyediki “Miyagi” namliq bir shirketning yaponiye réstoranlirigha satidighanliqi, bir parchisi 70 yén yeni dollargha 45 sént bolghan teyyar alyaska rok béliqining, adettiki bazar bahasidin 60-70 pirsent erzan ikenlikini éniqlighan. “Nikkéy asiya” ning qeyt qilishiche, ular shendungdiki xitay shirkitining Uyghurlar bilen bolghan alaqisini tekshürüsh arqiliq, bu shirketning 2020-yili 2-ayda 190 neper neper Uyghurni saqchilarning nazaritide ayropilan bilen shendunggha élip kelgenliki, shu yili 3-ayda yene poskam nahiyesidin nurghun Uyghurning shendungdiki shirkette ishleshke yolgha sélin'ghanliqini bayqighan.

“Nikkéy asiya” ning qeyt qilishiche, eyni waqitta poskam nahiyesi chong kölemlik uzitish pa'aliyiti ötküzüp, bu ishchilarni “Bir adem ishqa orunlashsa, pütün a'ile bay bolidu” dégen sho'ar astida yolgha salghan iken. “Nikkéy asiya” ning mezkur tekshürüsh doklati, BBC ning Uyghur mejburiy emgikige chétishliq “Shinjang pemidur qiyamliri” gha italiye markisi chaplinip en'gliye bazirida sétiliwatqanliqini ashkarilishining arqisidinla élan qilin'ghan.