Xitay hökümiti “Uyghur mejburiy emgiki” ni yene bir qétim inkar qildi

Yéqinda “Shinjangdiki ishqa orunlashturush we ijtima'iy kapalet xelq'ara muhakime yighini” ürümchide échilghan bolup, yighinda xitay hökümiti amérika we bashqa gherb döletlirini “Héchqandaq asassizla shinjangda ‛mejburiy emgek mewjut‚ dégendek asassiz yalghan-yawidaqni oydurup chiqarghan” dep eyibligen.

Xitay hökümitining karniyi bolghan “Shinjang géziti” ning xewirige qarighanda, 15-dékabir küni échilghan bu yighinda Uyghur aptonom rayonluq partkomning sékrétari ma shingrüy söz qilghan. U sözide, xelqning “Bextlik turmush” ni eng chong kishilik hoquq dep qarap, “Ishqa orunlashturush - eng chong xelq turmushi” ikenlikini emelde körsetkenlikini, shuningdek her millet emgekchilirining qanunluq hoquq-menpe'eti qanun boyiche kapaletke ige qilin'ghanliqini eskertken.

Xewerde éytilishiche, bu xelq'ara muhakime yighinigha xitaydiki alaqidar ministirliq we komitétlardin kelgen kishiler, shuningdek 44 dölet, rayon we xelq'ara teshkilattin kelgen chet ellik méhmanlar qatnashqan. “Shangxey hemkarliq teshkilati”, pakistan we yemenning xitaydiki bash elchiliri yighinda söz qilip, bu yighin arqiliq “Shangxey hemkarliq teshkilati” gha eza döletler arisidiki hemkarliqni ilgiri sürüshni arzu qilidighanliqini, shuningdek bu qétimqi muhakime yighinining dunyagha xitay Uyghur élining téximu köp “Heqiqiy ehwali” ni namayan qilishini ümid qilidighanliqini éytqan. Shuningdek bu rayondiki “Inaqliq, tinchliq we tereqqiyat” ning tasadipiyliq emeslikini, belki uning xitay ijra qilghan “Ilmiy tedbir arqiliq yéteklesh” ning netijisi ikenlikini tekitligen.

Wahalenki, noyabir éyida amérika weten xewpsizliki ministirliqi 29 xitay shirkitini “Uyghur mejburiy emgikining aldini élish qanuni” boyiche jazalighan bolup, nöwette mezkur qanun boyiche jazalash tizimlikige kirgüzülgen xitay shirketlirining sani 107 ge yetken. Shuningdek Uyghur élidiki mejburiy emgekning kölimi we salmiqining téximu éship méngiwatqanliqi oxshimighan uchur yolliridin melum bolushqa bashlighan.