D u q qatarliq teshkilatlar yawropa parlaméntini mejburiy emgek mehsulatlirini cheklesh nizamini maqullashqa chaqirghan

Washin'gtondin muxbirimiz erkin teyyarlidi
2024.04.19

Dunya Uyghur qurultiyini öz ichige alghan dunyadiki nurghun ammiwi teshkilatlar, menpe'et guruhliri, sana'et we soda uyushmiliri 18-aprél ortaq chaqiriq élan qilip, yawropa parlaméntini mejburiy emgek mehsulatlirining yawropa bazirigha kirishini cheklesh nizamini birdek maqullashqa chaqirghan.

76 Teshkilat, uyushma we menpe'et guruhi imza qoyghan ortaq chaqiriqta, yawropa parlaménti ezalirining kéler qétimliq yighinida terepler bu yil 3-ayda ortaq kélishim hasil qilghan mezkur nizamni qollap awaz bérishini telep qilghan. Yawropa ittipaqidiki döletler 3-ayning bashlirida mezkur nizam heqqide ortaq kélishim hasil qilghan, shundaqla bu nizam  3-ayning 20-küni yawropa parlaméntining xelq'ara soda, ichki bazar we istémalchilarni qoghdash komitétida mutleq köp awaz bilen maqullinip, yawropa parlaménti omumi yighinining maqullishigha sunulghan idi.

Yawropa ittipaqining mejburiy emgek mehsulatlirini cheklesh nizamida, Uyghur mejburiy emgiki alahide tilgha élinmighan bolsimu, shundaqla bu nizam amérikaning “Uyghur mejburiy emgikining aldini élish qanuni” dek küchlük qaratmiliqqa ige dep qaralmisimu, biraq bu nizam yenila Uyghur mejburiy emgek mehsulatlirini chekleshte belgilik rol oynaydighanliqi ilgiri sürülmekte.

Mezkur nizam, bu yilning deslepki ikki éyida Uyghur diyarining yawropa ittipaqidiki döletlerge chiqarghan éksporti ötken yilning oxshash mezgilidin 200 pirsenttin artuq köpeygen bir waqitta, yawropa parlaméntining maqullishigha sunulghan. Chaqiriqta, “Biz yawropa parlaméntining barliq ezalirining bu qanun etrapida ittipaqliship, parlaméntining aprél éyi ichide ötküzülidighan yighinida qollap awaz bérishini, uning ijra qilinishining yolini échishini chaqirimiz” déyilgen. Chaqiriqta qeyt qilinishiche, bu nizam maqullinip yolgha qoyulsa, yawropa ittipaqining mejburiy emgekke qarshi turush iqtidarini zor derijide kücheytidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.