Xitay mekit nahiyesidin 1025 neper Uyghur yashni "Ishlemchi"namida ichkiri ölkilerge yötkigen

Muxbirimiz erkin
2020-01-13
Élxet
Pikir
Share
Print

Xitay hökümiti "Yéza éshincha emgek küchliri" namidiki Uyghur yashlirini ichkiri ölkilerdiki zawut-karxanilarda ishlemchilikke yötkeshni dawamlashturmaqta. Xitay taratqulirining ashkarlishiche, xitay hökümiti 10‏-yanwar küni mekit nahiyesidin 1025 neper Uyghur yashni xitayning shendong, lyawning, jéjyang qatarliq 8 ölkisidiki zawut -karxanilargha ishlemchilikke yötkigen. Bu , 2020‏-yili kirgendin béri Uyghur diyarining bir nahiyesidinla xitayning ichkiri ölkilirige bir qétimda eng köp Uyghur ishlemchining yötkilishidur.

Xitay hökümiti Uyghurlarni "Ishqa orunlashturush" namida yötkep, xitay zawut-karxanilirida mejburi emgekke sélish bilen eyibliniwatqan mezgilde Uyghur yashlirining "Ishlemchi" dégen namda zor  türkümlep yötkilishi diqqet qozghaydighan mesilige aylinip qalghan. Xitay hökümiti mezkur mesilide Uyghur a'ililerni parchilap, minglighan Uyghur balilirining ata-anisiz qélishi, Uyghurlarning medeniyiti, ana tili, diniy étiqadi we turmush usuli bilen bolghan béghining buzghunchiliqqa uchrishini keltürüp chiqirish bilen eyiblinip kelgen.  Da'iriler ötken hepte 2018- we 2019‏-yilliri Uyghur ishlemchilerni yötkeshte rékort yaratqanliqi, bu mezgil ichide rayondiki  22 nahiyedin 140 ming ishlemchini yötkep, 3 yilliq pilanni bir yil burun orundighanliqini élan qilghanidi.

"Shinjang xewerliri" torining 13‏-yanwar ashkarlishiche, mekit nahiyelik partkomning pilani bu yil ichide mezkur nahiyedin  ichkiri ölkilerge we rayon ichige 5000 Uyghur yashni yötkesh iken. Xitay hökümiti Uyghurlarning "Kespiy terbiyelesh merkezliri " namidiki orunlarda dölet tili, qanun we kespiy terbiye élip, ishqa orunlishishigha yardem qiliwatqanliqini ilgiri sürsimu, lékin shahitlarning guwahliqi we kishilik hoquq teshkilatlirining doklatlirida xitayning lagirdiki tutqunlarni zawut -karxanilargha yötkep, mejburi emgekke séliwatqanliqi,  bu arqiliq ularning medeniyiti, tili, diniy étiqadi bilen bolghan béghini üzüp tashlashni meqset qilghanliqi tekitlenmekte.

Toluq bet