“Maliye waqti géziti” xitayning meschitlerni özgertishi heqqide muhim doklat élan qildi

“Maliye waqti géziti” xitay hökümitining Uyghur élide islamgha qarshi yolgha qoyghan siyasetlirini, bolupmu meschitlerni chéqish we özgertish qilmishlirini bashqa ölkilergimu kéngeytiwatqanliqini xewer qilghan.

27-Noyabir küni élan qilin'ghan doklat xaraktérlik xewerde Uyghur éli, béyjing, yünnen, gensu we ningshiya qatarliq ölke-sheherlerdiki 2300 din artuq meschit tetqiq qilin'ghan hemde ulardiki özgirish resim bilen körsitip bérilgen.

Xewerde körsitilishiche, 2018-yilidin tartip 2023-yilighiche bolghan ariliqta xitay hökümiti meschitlerning tengdin tolisini ya pütünley weyran qilghan yaki uning erebche mémarchiliq uslubini buzup, ularning munar we gümbezlirini éliwetken. Bu heqte pikir bayan qilghan mutexessisler, buning “Islam medeniyitining xitayda ghayib bolushi” din dérek béridighanliqini bildürgen.

Mezkur doklat élan qilin'ghandin kéyin küchlük diqqet qozghimaqta. Tarixchi jeymis milward “X” tiki inkasida “Islam dini xitayda ming yillardin béri mewjut bolup kelgen din bolsimu, emma shi jinping hakimiyitining uni yoq qilishqa bel baghlighanliqi” ni körsitip ötken.

“Maliye waqti géziti” ning déyishiche, ular béyjinggha jaylashqan we xitay boyiche eng chong meschitlerning biri bolghan dowdiyen meschitining özgertilishi heqqide yerliklerning hem shundaqla bu meschitke kiridighan tunggan musulmanlirining köz qarishini almaqchi bolghan, biraq ular hökümetning öch élishidin qorqup jawab bérishke jür'et qilalmighan.