Rachil xarris: “Meschitlerni chéqish-xitayning Uyghur medeniyitige qarshi urushidiki yéngi taktikisi”

Uyghur élidiki lagérlarning jaylishish we omumlishish ehwalini gogul xeritisi analizi arqiliq ashkarilap bergen kananadiki xitay ziyaliysi shawn jang yéqinda sün'iy hemrahidin tartilghan süretlerge asasen xotenning kériye nahiyesidiki 1000 yildin uzun tarixqa ige meschitning hazir sün'iy hemrahidin tartilghan süretlerde yoqluqini ashkarilighan idi.

Gerche mezkur meschitning xitay hökümiti teripidin chéqiwétilgenliki téxi bashqa menbeler, jümlidin yerlik da'iriler teripidin delillenmigen bolsimu, emma ijtima'iy tor betlerde bu meschitning chéqilghan bolush éhtimalliqi küchlük naraziliq qozghidi.

Bügün yene, london uniwérsitétining oqutquchisi, Uyghur muzika tetqiqatchisi, doktor rachél xarris xanim “Muhapizetchi” gézitide mushu heqte maqale élan qilip, xitay hökümitining Uyghur élidiki tarixi meschitler we jümlidin pütkül bir medeniyetni weyran qilishi heqqide mexsus toxtaldi.

U maqaliside, xitay hökümiti teripidin chéqilghanliqi ilgiri sürülüwatqan kériye meschitining 1237-yilliri sélin'ghan tarixi bir meschit ikenlikini tonushturush bilen birge, Uyghur élidiki meschitlerning xitayning rayondiki milliy we dini kimlikke hujum qilip yürgüzüwatqan siyasetlirining nishani bolghanliqini eskertken.

U maqalisi dawamida, mana bu seweblik islam döletlirining Uyghur élidiki dini we milliy bayliqlargha qarita qiliniwatqan hujumgha qarshi heriketke ötüshi kéreklikini, pütün dunya döletlirining kishilik hoquq üchün awaz chiqirishi kéreklikini eskertken.