Xitay da'iriliri ili oblastida kadirlarni mesile tapshurushqa mejburlimaqta

Muxbirimiz erkin
2019-03-25
Élxet
Pikir
Share
Print

Yéqinda ili oblastliq partkomning intizam tekshürüsh komitéti kadirlarning "Mesile tapshurush herikiti" qozghap, kadirlarning burun sadir qilghan mesililirini mejburiy tapshurushi kéreklikini belgilep, eger tapshurmighanlar bayqilip qalsa qattiq bir terep qilishqa bashlighan.

Xitayda tarqitilidighan "Junggo xewerliri" torining ashkarilishiche, da'iriler "Yuqiri bésim bilen heywe qilish we siyasiy tesirlendürüsh arqiliq" nechche ming kadirni mesile tapshurghuzghan. Xitay hökümiti ilgiri bu xil usulni Uyghur déhqanlirigha qollan'ghan. 2017‏-Yili keng kölemlik tutqun herikiti bashlinishtin burun Uyghur déhqanlirini mesile tapshurushqa qistap, ulargha arxip turghuzghan.

Özlirining burun namaz oqughanliqi, balilirining haraq ichishini chekligenliki yaki bashqilargha diniy témilarda söz qilghanliqini ashkarilighan nurghun déhqanlar 2017‏-yildiki tutqun qilish herikitide qamaq jazasigha höküm qilin'ghan yaki lagérlargha qamalghan idi.

"Junggo xewerliri" ning ashkarilishiche, ili oblastliq partkom bu qétim qozghighan kadirlarning mesile tapshurush herikitide 6897 weqege délo turghuzulup, 5585 kadirgha intizam jazasi we memuriy jaza bérilgen. 119 Kishi edliye organlirining bir terep qilishigha tapshurup bérilgen.

Xewerde, yuqiri bésimda heywe qilish, siyasiy tesirlendürüsh arqiliq "Intizamgha, qanun'gha xilapliq qilghan, wezipide xataliq ötküzgen partiye ezaliri we memuriy xadimlarning aktip mesile tapshurushi, özini melum qilip, kengchilik bilen bir terep qilishqa érishishke righberlendürülgenliki" tekitlen'gen. Lékin xewerde, bu kadirlarning qandaq "Xataliqlar" ni sadir qilghanliqi we konkrét qandaq mesililerni tapshurghanliqi tilgha élinmighan.

Xewerde bayan qilinishiche, ili oblastliq milletler we diniy ishlar komitétining bir kadiri mesile tapshurup, "Özining burun teley sinap béqish rohiy halitide bolghanliqi" ni ilgiri sürgen.

Bu kadirning ilgiri sürüshiche, u intizam tekshürüsh komitétining aktipliq bilen mesile tapshurush, özini melum qilish heqqidiki uqturushini körüp, mesilisining haman ashkarilinidighanliqi, shunga mesilini teshkilge éniq éytish niyitige kelgenlikini bildürgen. Lékin közetküchilerning qarishiche, bu heriket qélip qalghan axirqi türkümdiki yerlik kadirlarni jazalash we ularni hökümet, partiye organliridin siqip chiqirishni meqset qilidiken.

Toluq bet