Uyghurlarning yene “Mesile tapshurush we pash qilish” qa mejburliniwatqanliqi melum bolmaqta

Cherchen nahiyesidiki bir yézidila atalmish “Qara küchler” ge a'it 3500 parche pash qilish jedwili yighilishi küchlük diqqet qozghidi.

Cherchen nahiyelik hökümet tor bétide 9-aprél künide élan qilin'ghan bir parche xewerdin melum bolushiche, cherchen nahiyesining yéngi östeng yézisidiki amma “Qara küchlerge qarshi küresh qilish” heqqidiki bir seperwerlik yighinigha uyushturulghan. Yighinda hökümet da'iriliri ammini atalmish “Qara küchler” ge da'ir özi bilidighan uchurlarni qet'iy pash qilish heqqide tapshuruq bergen.

Xewerdiki süretlerdin yézidiki qéri-yash Uyghurlarning qoligha qeghez tarqitip bérilgenliki we yighin axirida herbir kishining retke tizilip turup allinémilerni pash qilghan bir parche qeghezni xitay hökümet xadimi kötürüwalghan “Pash qilish sanduqi” gha séliwatqanliqi körsitilgen. Cherchen nahiyelik hökümet toridiki xewerde “Neq meydandiki seperwerliktin kéyin qara küchlerge munasiwetlik 3500 parchidin artuq pash qilish jedwili yighiwélindi” dégen.

Xitay merkizi hökümitining yolyoruqigha asasen Uyghur aptonom rayoni miqyasi boyiche atalmish “Qara küchlerni tazilash we rezillikni tügitish” herikiti qozghalghan idi. Yéqinda bayin'gholin oblastliq hökümet mushu heqte bergen bir uqturushida qara küchlerni “Milliy bölgünchilik, diniy esebiylik we térrorluq bilen shughullinidighan teshkilatlar we jama'etler, asasi qatlamgha suqunup kirip uni monopol qiliwalghanlar, yurtdashliq, tughqanchiliq, dindashliq rishtisi boyiche guruh uyushturghanlar, bölgünchi, diniy esebiy küchlerni qanat astigha alghan ‛ikki yüzlimichi kadirlar‚, chet'eldiki ‛qara guruh we rezil küchler‚ bilen alaqisi barlar we bashqilarni erz qilishqa qutratqanlar” dep sherhligen.

Chet'ellerdiki Uyghur közetküchiler “Qara guruhlar” we “Rezil küchler” ni tazilash herikitining asasliq nishanining yenila Uyghurlar ikenlikini bildürmekte. Ularning qarishiche, yuqiriqi yéngi östeng yézisidinla 3500 din artuq uchur yighiwélinishi yene nurghun Uyghurlarning yoqilang bahaniler bilen lagérgha qamilidighanliqidin dérek béridiken.