Уйғурларниң йәнә «мәсилә тапшуруш вә паш қилиш» қа мәҗбурлиниватқанлиқи мәлум болмақта

Мухбиримиз ирадә
2019-04-11
Елхәт
Пикир
Share
Принт

Чәрчән наһийәсидики бир йезидила аталмиш «қара күчләр» гә аит 3500 парчә паш қилиш җәдвили йиғилиши күчлүк диққәт қозғиди.

Чәрчән наһийәлик һөкүмәт тор бетидә 9-апрел күнидә елан қилинған бир парчә хәвәрдин мәлум болушичә, чәрчән наһийәсиниң йеңи өстәң йезисидики амма «қара күчләргә қарши күрәш қилиш» һәққидики бир сәпәрвәрлик йиғиниға уюштурулған. Йиғинда һөкүмәт даирилири аммини аталмиш «қара күчләр» гә даир өзи билидиған учурларни қәтий паш қилиш һәққидә тапшуруқ бәргән.

Хәвәрдики сүрәтләрдин йезидики қери-яш уйғурларниң қолиға қәғәз тарқитип берилгәнлики вә йиғин ахирида һәрбир кишиниң рәткә тизилип туруп аллинемиләрни паш қилған бир парчә қәғәзни хитай һөкүмәт хадими көтүрүвалған «паш қилиш сандуқи» ға селиватқанлиқи көрситилгән. Чәрчән наһийәлик һөкүмәт торидики хәвәрдә «нәқ мәйдандики сәпәрвәрликтин кейин қара күчләргә мунасивәтлик 3500 парчидин артуқ паш қилиш җәдвили йиғивелинди» дегән.

Хитай мәркизи һөкүмитиниң йолйоруқиға асасән уйғур аптоном райони миқяси бойичә аталмиш «қара күчләрни тазилаш вә рәзилликни түгитиш» һәрикити қозғалған иди. Йеқинда байинғолин областлиқ һөкүмәт мушу һәқтә бәргән бир уқтурушида қара күчләрни «миллий бөлгүнчилик, диний әсәбийлик вә террорлуқ билән шуғуллинидиған тәшкилатлар вә җамаәтләр, асаси қатламға суқунуп кирип уни монопол қиливалғанлар, юртдашлиқ, туғқанчилиқ, диндашлиқ риштиси бойичә гуруһ уюштурғанлар, бөлгүнчи, диний әсәбий күчләрни қанат астиға алған ‹икки йүзлимичи кадирлар', чәтәлдики ‹қара гуруһ вә рәзил күчләр' билән алақиси барлар вә башқиларни әрз қилишқа қутратқанлар» дәп шәрһлигән.

Чәтәлләрдики уйғур көзәткүчиләр «қара гуруһлар» вә «рәзил күчләр» ни тазилаш һәрикитиниң асаслиқ нишаниниң йәнила уйғурлар икәнликини билдүрмәктә. Уларниң қаришичә, юқириқи йеңи өстәң йезисидинла 3500 дин артуқ учур йиғивелиниши йәнә нурғун уйғурларниң йоқилаң баһаниләр билән лагерға қамилидиғанлиқидин дерәк беридикән.

Толуқ бәт