Мәсут өзил арсеналниң уйғур мәсилисини қоллимиғанлиқини тәнқид қилди

Мухбиримиз ирадә
2020-08-13
Елхәт
Пикир
Share
Принт

Германийәлик путбол чолпини мәсут өзил арсенал путбол кулубини уйғур мәсилисидики позитсийәси сәвәблик тәнқид қилған.

Арсенал кулубиниң даңлиқ топчиси мәсут өзил 2019-йили декабирда өзиниң тиветтер, фейсбук, инстиграм қатарлиқ таратқулардики һесаби арқилиқ уйғурларға қилиниватқан зулумға наразилиқини ипадилигән шундақла мусулман әллириниң уйғурлар учраватқан зулумға сүкүт қиливатқанлиқини әйиблигән иди. Әйни чағда арсенал кулуби дәрһал хитайдики вейбо торида ипадә билдүрүп: «кулубниң сиясий мәсилиләргә арилашмайдиғанлиқини» тәкитлигән.

Әнглийәдики «қуяш» гезитиниң хәвәр қилишичә, уйғур мәсилисидә өзиниң сиясәткә арилашмайдиғанлиқини илгири сүргән арсенал кулуби болса америкадики җорҗ флойидниң өлүми нәтиҗисидә қозғалған «қара тәнликләрниң һаятиму қиммәтлик» һәрикитини қоллап ипадә билдүргән.

Мәсут өзил арсеналниң бу мәсилидики мушундақ икки хил өлчимини тәнқид қилған. У «қуяш» гезитигә қилған сөзидә: «мән арсенал кулубиға нурғун төһпиләрни қошқан идим. Шуңа уларниң бундақ ипадә билдүрүши мени үмидсизләндүрди. Улар өзлириниң сиясәткә арилашмаймдиғанлиқини илгири сүриду, бирақ бу сиясий мәсилә әмәс иди. Әмма улар башқа мәсилиләргә арилашти,» дегән.

У «‹қара тәнликләрниң һаятиму қиммәтлик' һәрикитигә аваз қошқан арсенал кулубиниң охшаш позитсийәни уйғур мусулманлири үчүнму көрсәткән болушини үмид қилғанлиқини ейтип: «мусулманларниң һаятиму қиммәтлик, сизниң қайси дин яки рәң болушиңиз муһим әмәс-мусулман, христиан, йәһудий, қара, ақ яки башқа нәрсә болушиңиздин қәтийнәзәр, биз һәммимиз охшаш» дәп әскәрткән.

Германийә пуқралиқидики түркләрдин болған дуняға даңлиқ путбол чолпини, арсенал путбол кулубиниң юқири баһалиқ топчилириниң бири дәп қарилидиған мәсут өзил әйни чағда зулумға наразилиқини ипадилигән бу йолланмиси арқилиқ уйғурлар мәсилигә қарита хәлқаралиқ диққәт қозғиған санақлиқ даңлиқ шәхсләрниң бири болуп қалған иди.

Чәтәлләрдики көзәткүчиләр мәсут өзилниң оттуриға чиқиши аддий бир мәсилә болуп қалмай, бәлки униң инсаний қиммәт билән пул-байлиқ арисида қилған наһайити муһим бир таллишидур, дәп юқири баһа бәргән.

Пикирләр (0)
Share
Толуқ бәт