Xitay tor qanili mes'ut özil seweblik toxtitip qoyulghan "Arsénal" ning musabiqisini qayta qoyushqa bashlighan

Muxbirimiz erkin
2019-12-27
Élxet
Pikir
Share
Print

Xitay ammiwi tor qanili PPTV gérmaniye putbol cholpini mes'ut özilning Uyghurlar heqqidiki sözi seweblik toxtitip qoyulghan en'gliye "Arsénal" putbol kulubining musabiqisini qayta qoyushqa bashlighan.

"Wol-stérét zhurnili" gézitining xewer qilishiche, PPTV "Arsénal" ning musabiqisini qayta qoyghan bolsimu, lékin putbol mulahizichisi pütkül musabiqide mes'ut özilning ismini peqet tilgha almighan.
Mes'ut özil 13‏-dékabir küni tiwéttér, féysbuk, instigram qatarliq taratqularda pikir yézip, Uyghurlargha héssidashliq qilidighanliqini ipadiligen shundaqla musulman ellirining Uyghurlar uchrawatqan zulumgha süküt qiliwatqanliqini eyibligen idi. U ")Xitayda( qur'an köydürülmekte, meschitler taqalmaqta, medrisiler cheklenmekte, diniy zatlar öltürülmekte. Buninggha qarimay musulmanlar süküt qilmaqta" dep yazghan idi.
Özilning sözi rayondiki 2 milyondek musulman tutqunlar qamalghan lagérlarni "Kespiy terbiyelesh merkezliri" dep aqlawatqan xitay hökümiti we xitay tor abuntlirining qarshiliqigha uchrighan. "Mes'ut özil xitayda qarshi élinmaydighan adem," dep élan qilin'ghan. Xitaydiki qanallar "Arsénal" ning musabiqisini tarqitishni toxtatqan idi. Lékin "Wol-stérét zhurnili" gézitining xewiride qeyt qilinishiche, PPTV ‏26-dékabir küni tuyuqsiz arsénal bilen borénmos kulubining musabiqisini tarqitishi xitay tor abuntlirini heyran qaldurghan. Bezi abuntlar PPTV ning pikir taxtisigha xet yézip, mezkur tor qanilini tenqidligen.
Mesut özil Uyghurlar heqqidiki sözi seweblik xitay hökümiti we xitay tor abuntlirining hujumigha uchrighan bolsimu, lékin u amérika tashqiy ishlar ministirliqi we kishilik  hoquq teshkilatlirining qollishigha érishken. Amérika tashqiy ishlar ministiri mayk pompéyo mesut özilni qollaydighanliqini bildürüp, xitay kompartiyesi mes'ut özilni xitaydiki mestaniliridin ayriwételisimu emma xitay "Uyghurlar we bashqa diniy étiqadlargha qarita sadir qiliwatqan éghir kishilik hoquq depsendichiliklirini dunyadin yoshuralmaydu" dégen. Mes'ut özilning sözi yene yéngi zélandiye zeytun top cholpini soniy bil williyamisning qollishigha érishken idi.
Toluq bet