Gérmaniye, en'gliye, yawropa ittipaqi qatarliqlar lagérlar heqqidiki mexpiy höjjetlerge inkas bildürdi

Muxbirimiz erkin
2019-11-26
Share

Gérmaniye, en'gliye eller we yawropa ittipaqi xitayning 24‏-noyabir küni ashkarilan'ghan lagérlar heqqidiki mexpiy höjjitige inkas bildürüp, xitay hökümitini xelq'ara jem'iyetning rayonda erkin tekshürüsh élip bérishigha yol qoyushqa chaqirdi.

Gérmaniye tashqi ishlar ministiri xeyko ma'as 26‏-noyabir küni gérmaniye "Sudétén zéytung" gézitining ziyaritini qobul qilghanda, xitayning üstige alghan xelq'ara kishilik hoquq mes'uliyitini ada qilishi kéreklikini bildürüp, "Eger lagérlarda yüz minglighan Uyghur tutup turuluwatqan bolsa, xelq'ara jem'iyet buninggha köz yumalmaydu" dégen.

En'giliye "Muhapizetchi" gézitining xewer qilishiche, en'giliye tashqi ishlar ministirliqi 25‏-noyabir küni bayanat élan qilip, xitayni b d t ning Uyghur rayonidiki "Lagérlarda derhal we cheklimisiz tekshürüsh élip bérishi" gha yol qoyushqa chaqirghan. Xewerde, en'gliye tashqi ishla ministirliqining bu chaqiriqni élan qilishigha xitayning yéqinda ashkarilan'ghan lagérlar heqqidiki mexpiy höjjiti seweb bolghanliqi tekitlen'gen.

Xewerde qeyt qilinishiche, en'gliye tashqi ishlar ministirliqi bayanatchisi xitayning Uyghur musulmanlirigha we shinjangdiki bashqa étnik milletlerge qaritilghan medeniyet, diniy erkinlik jehetlerdiki chékidin ashqan cheklimilirige xatime bérishini telep qilidighanliqi" ni bildürgen. Shu küni yene yawropa ittipaqi bayanat élan qilip, rayondiki siyasiy "Qayta terbiyelesh lagérliri" ni tenqid qilghan. Yawropa komissiyesining ayal bayanatchisi, özlirining yéngi ashkarilan'ghan mexpiy höjjetning tepsilatlirigha baha bermeydighanliqini bildürüp, lékin "Siyasiy qayta-terbiyelesh lagérlirining mewjutluqigha, shinjangdiki Uyghur we bashqa az sanliq milletlerning keng kölemlik teqiblinishi we medeniyet, diniy erkinliklirining cheklinishige qarshi izchil pikri bildürüp kéliwatqanliqi" ni tekitligen. 24‏-Noyabir küni washin'gtondiki "Xelq'ara tekshürüsh axbaratchiliqi birleshmisi" xitayning lagérdiki tutqunlarni qandaq bashqurush heqqidiki mexpiy höjjetlirini ashkarilap, xelq'arada qattiq ghulghula qozghighanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet