Москваниң 1945-йилидики или инқилабиға аит мәхпий һөҗҗити водров вилсон мәркизи архипидин орун алди

Мухбиримиз үмидвар
2016-11-30
Share

Америкидики водров вилсон мәркизиниң соғуқ мунасивәтләр дәври тарихи лайиһисиниң совет иттипақиниң 1934-1949-йиллиридики уйғур дияриға аит мәхпий һөҗҗәтлири архипидин 1945-йили 29-апрел күни совет иттипақи ички ишлар хәлқ комиссари лаврентий берия билән ташқи ишлар хәлқ комиссари андрей вишенскийниң бирликтә совет иттипақи алий рәһбәрлири сталин вә молотофқа йоллиған или инқилабиниң җәрянлири вә еришкән ғәлибилири һәмдә буниңдин кейин қозғилаңчиларға көрситиш керәк болған ярдәм лайиһилири һәққидики мәхпий доклатиниң инглизчә тәрҗимиси елан қилинған.

Водров вилсон мәркизиниң тор бетидин орун алған мәзкур мәхпий һөҗҗәттә, берия вә вишенский 1944-йили, 12-ноябир күни ғулҗа қозғилиңи нәтиҗисидә шәрқий түркистан җумһурийити қурулғанлиқи, қозғилаңчиларниң пүтүн или вилайитини толуқ азад қилғанлиқи вә қозғилаңчиларниң бу җәрянда гоминдаң қораллиқ күчлиридин олҗа алған қорал-ярақлири, оқ-дора вә башқа әслиһәлириниң толуқ тизимлики һәм башқа бир қатар мунасивәтлик әһваллар баян қилинған.

Берия вә вишенский өзлириниң мәзкур мәхпий доклатида йәнә, миллий армийә вә алтай қазақ қозғилаңчилириниң сани һәм гоминдаң күчлири һәққидә мәлумат бәргән.

Улар мәхпий доклатта йәнә, сталин вә молотоф башчилиқидики сиясий бюродин или инқилабиға вә миллий армийәгә җиддий көрситиш керәк болған йәттә түрлүк һәрбий, сиясий вә маддий ярдәм лайиһисини оттуриға қойған.

Водров вилсон мәркизи елан қилған 22-июндики йәнә бир совет мәхпий һөҗҗитидин ашкарилинишичә, сталин сиясий бюроси бу лайиһигә пәқәт 1945-йили, 6-айниң 22-күни қошулуп, миллий армийиниң үч фронт бойичә гоминдаң армийисигә қарши һуҗумға өтүшигә ярдәм көрсәткән.

20-Әсир уйғур дияри сиясий тарихи, җүмлидин 20-әсирниң биринчи йеримидики совет, хитай мунасивәтлири нөвәттә хәлқара тарихшунаслиқ саһәсидики муһим темиларниң бири болмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт