Moskwaning 1945-yilidiki ili inqilabigha a'it mexpiy höjjiti wodrow wilson merkizi arxipidin orun aldi

Muxbirimiz ümidwar
2016-11-30
Share

Amérikidiki wodrow wilson merkizining soghuq munasiwetler dewri tarixi layihisining sowét ittipaqining 1934-1949-yilliridiki Uyghur diyarigha a'it mexpiy höjjetliri arxipidin 1945-yili 29-aprél küni sowét ittipaqi ichki ishlar xelq komissari lawréntiy bériya bilen tashqi ishlar xelq komissari andréy wishénskiyning birlikte sowét ittipaqi aliy rehberliri stalin we molotofqa yollighan ili inqilabining jeryanliri we érishken ghelibiliri hemde buningdin kéyin qozghilangchilargha körsitish kérek bolghan yardem layihiliri heqqidiki mexpiy doklatining in'glizche terjimisi élan qilin'ghan.

Wodrow wilson merkizining tor bétidin orun alghan mezkur mexpiy höjjette, bériya we wishénskiy 1944-yili, 12-noyabir küni ghulja qozghilingi netijiside sherqiy türkistan jumhuriyiti qurulghanliqi, qozghilangchilarning pütün ili wilayitini toluq azad qilghanliqi we qozghilangchilarning bu jeryanda gomindang qoralliq küchliridin olja alghan qoral-yaraqliri, oq-dora we bashqa eslihelirining toluq tizimliki hem bashqa bir qatar munasiwetlik ehwallar bayan qilin'ghan.

Bériya we wishénskiy özlirining mezkur mexpiy doklatida yene, milliy armiye we altay qazaq qozghilangchilirining sani hem gomindang küchliri heqqide melumat bergen.

Ular mexpiy doklatta yene, stalin we molotof bashchiliqidiki siyasiy byurodin ili inqilabigha we milliy armiyege jiddiy körsitish kérek bolghan yette türlük herbiy, siyasiy we maddiy yardem layihisini otturigha qoyghan.

Wodrow wilson merkizi élan qilghan 22-iyundiki yene bir sowét mexpiy höjjitidin ashkarilinishiche, stalin siyasiy byurosi bu layihige peqet 1945-yili, 6-ayning 22-küni qoshulup, milliy armiyining üch front boyiche gomindang armiyisige qarshi hujumgha ötüshige yardem körsetken.

20-Esir Uyghur diyari siyasiy tarixi, jümlidin 20-esirning birinchi yérimidiki sowét, xitay munasiwetliri nöwette xelq'ara tarixshunasliq sahesidiki muhim témilarning biri bolmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet