Xitayning lagérlar heqqidiki 24 betlik mexpiy höjjetni kimning teminligenliki ashkarilandi

Muxbirimiz erkin
2019-12-09
Élxet
Pikir
Share
Print

Yéqinda washin'gtondiki "Xelq'ara tekshürüsh axbaratchiliqi instituti" xitayning lagérlar heqqidiki 24 betlik mexpiy höjjitini ashkarilap, dunyani zilzilige salghan.

Mexpiy höjjette, xitay hökümiti "Kespiy terbiyelesh merkezliri" dep perdazlap kéliwatqan yighiwélish lagérlirining heqiqiy mahiyiti échip bérilgen. Bu höjjetlerni "Xelq'ara tekshürüsh axbaratchiliqi instituti" gha kimning teminligenliki bir sir bolup kéliwatqan idi. Lékin, gollandiye taratqulirining ötken hepte axiri ashkarilishiche, lagérlar heqqidiki 24 betlik mezkur höjjetni gollandiyede turushluq Uyghur ziyaliysi asiya abdulehet xanim teminligen iken. Asiya xanimning bildürüshiche, mezkur höjjetni bu yil 6‏-ayda özini ashkarilashni xalimaydighan bir kishi uninggha yetküzgen. U bu höjjetni uning bilen alaqileshken gérmaniyelik mutexessis adri'an zénz bilen yene bir mutexessiske körsetken. Ular asiyeni bir muxbirgha tonushturghan. Bu höjjet 24‏-noyabir küni on nechche axbarat orgini we 70 tek muxbir teripidin tekshürülüp jezmleshtürülgendin kéyin élan qilin'ghanidi.

"Nyu-york waqti géziti" ning xewiride tekitlinishiche, bu jeryanda asiye abdul'ehet xitay bixeterlik xadimlirining qattiq tehditige uchrighan. U bir qétim "Emdi boldi qilmisang, jesitingni parchilap, ishik aldingdiki exlet sanduqigha tashliwétimiz" dégen tehdit xéti tapshuruwalghan. Hetta bu yil 9‏-ayning bashlirida xitay bixeterlik xadimliri uning burunqi éri jesur hebibullani aptonom rayonluq sotta ishleydighan bir dosti arqiliq dubeyge aldap apirip soraq qilghan. Soraqta, uninggha özliri bilen hemkarlashmisa öltürüwétidighanliqi heqqide tehdit salghan. Lékin, asiye bilen jesur bu tehditke bash egmey yenila mezkur höjjetni ashkarilashni qarar qilghan. Asiya abdulehetning taratqulargha bildürüshiche, u "Peqet jasaret bilen aldigha chiqishla uning bixeterlikige kapaletlik qilalaydighanliqini oylap, özini ashkarilashni qarar qilghan" iken.

Asiya abdulehet 2009‏-yili gollandiyege kélip olturaqlashqan bolup, nöwette u 6 we 8 yashliq ikki perzentning anisi.

Toluq bet