Америка ташқи ишлар министирлиқиниң тор бетидә уйғур мәсилиси үчүн мәхсус сәһипә ечилди

Мухбиримиз ирадә
2020-09-04
Елхәт
Пикир
Share
Принт

Америка ташқи ишлар министирлиқи өз тор бетидә уйғурлар учраватқан зулумға беғишланған мәхсус сәһипә тәсис қилди. «Хитай компартийәсиниң шинҗаңдики кишилик һоқуқ дәпсәндичилики» дәп аталған бу сәһипә инглизчә, русчә, әрәбчә вә хитайчидин ибарәт төт хил тилда тәсис қилинған.

Униңда «шинҗаңда немә болуватиду», «мәҗбурий әмгәк», «мәҗбурий нопус контрол қилиш», «дини әркинликни дәпсәндә қилиш», «ташқи ишлар министири помпейониң баянлири» қатарлиқ мәхсус темилар бойичә айрим бәтләр тәсис қилинип, уйғур елидә йүз бериватқан еғир кишилик һоқуқ дәпсәндичиликлири системилиқ һалда чүшәндүрүп берилгән.

Бу сәһипидә йәнә америка ташқи ишлар министири майк помпейониң бүгүнгичә уйғурлар һәққидә бәргән барлиқ баянатлири, телевизийә зиярәтлири шундақла америка ташқи ишлар министирлиқи вә сода министирлиқи тәрипидин һазирғичә уйғур елидики зулумға алақидар елан қилинған барлиқ җаза тәдбирлири, виза чәклимиси вә алақидар қанун-түзүмләр бирму-бир тизип чиқилған.

Чәтәлләрдики уйғур көзәткүчиләр америка ташқи ишлар министирлиқиниң уйғур мәсилисигә беғишланған 4 тиллиқ бундақ сәһипә тәсис қилиши американиң уйғур мәсилисигә бериватқан зор әһмийитини намаян қилиду, дәп қаримақта.

Мәзкур сәһипини бу адрестин зиярәт қилалайсиз: https://www.state.gov/ccpabuses

Пикирләр (0)
Share
Толуқ бәт