Pakiz énérgiyege chirmashqan "Meynet méhnetler" dawamliq tenqid obyékti bolmaqta

Muxbirimiz eziz
2021-04-13
Share

Uyghur diyaridiki mejburiy emgek mesilisi izchil dunyaning zor derijide diqqitini qozghawatqan bolup, yéqindin buyan buning bir muhim nuqtisi dunya boyiche eng pakiz we sap énérgiye, dep qariliwatqan quyash énérgiyesi sahesige merkezlishishke bashlidi.

Quyash énérgiyesining dunya miqyasida omumlishishi hemde kilimat mesilisining dunyawi mesilige aylinishigha egiship buningdiki eng muhim halqa bolghan énérgiye taxtisi (kök tash) gha bolghan éhtiyaj zor derijide ashqan. Buning bilen ghayet zor sandiki erzan bahaliq kök tashlar xitaydin import qilinip, xelq'ara bazarda yétekchi orunni igiliwalghan. Emma yéqindin buyan xitaydin import qiliniwatqan bu taxtilarning Uyghurlarni mejburiy emgekke sélish bilen zich baghlinishliq ikenliki köplep melum bolghanliqtin, herqaysi döletler bu xildiki "Zamaniwi qullar emgiki" bedilige pütken pakiz énérgiye wasitisini qollinish yaki qollanmasliq mesili'isde ikkilinip qélishqa bashlidi.

"Tashqi siyaset" zhurnilining 12-apréldiki xewiride éytilishiche, xitaydin import qiliniwatqan kök tashlarning bahasi erzan bolghanliqtin gherb dunyasidiki bazarda sétiliwatqan mehsulatlarning mutleq köp qismini mushular igiligen. Buning bilen erzan bahaliq kök tashlar erzan bahaliq pakiz énérgiye berpa qilghan bolsimu emdilikte buninggha chirmiship ketken mejburiy emgek mesilisini herqaysi sahediki kishiler "Meynet méhnet" dep tenqid qilmaqtiken.

Maqalida körsitilishiche, bu xil "Iplas méhnet" yalghuz Uyghurlarni mejburiy emgekke sélish bilen tügimestin yene heddidin ziyade erzan bolghanliqi bilen gherb dunyasidiki nurghun kök tash zawutlirini weyran qiliwetken. Bu menidin alghanda meyli Uyghurlar bolsun yaki gherb istémalchiliri bolsun buning qoshlap ziyinigha uchrimaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet