"Mikrosoft" tetqiqat témilirining xitay hökümitining Uyghurlarni teqib qilishida ishlitilgen bolushi otturigha chiqmaqta

Muxbirimiz irade
2019-04-12
Élxet
Pikir
Share
Print

"Mikrosoft" shirkitining xitaydiki bir uniwérsitét bilen birliship élip barghan tetqiqat témiliri xitay hökümiti teripidin Uyghurlarni nazaret we teqib qilish üchün ishlitilgen bolushi mumkinliki ilgiri sürülmekte we jiddiy ghulghula peyda qilmaqta.

Firansiye agéntliqining xewer qilishiche, yéqinda mikrosoft shirkitining xitay armiyesige qarashliq bolghan xitay dölet mudapi'e uniwérsitéti bilen az dégende 3 tetqiqat témisi üstide hemkarlashqanliqi otturigha chiqqan. Bu weqe amérika shirketlirining xitaydiki teqib sistémisigha biwasite yaki wasitilik halda shérik bolush mesilisini yene bir qétim otturigha sörep chiqti.

Melum bolushiche, bu hemkarliq türliri yüz tonush we uni analiz qilish shundaqla kompyutérda grammatikiliq tehlil yürgüzüsh arqiliq tordiki mezmunlarni chüshinish qabiliyitige ige bolush qatarliq bir qanche xil sün'iy idrak téxnikilirini öz ichige alidiken.

Amérikadiki mérkator tetqiqat institutining tetqiqatchisi héléna légarda firansiye agéntliqigha qilghan sözide "Xitayning yuqirida ismi tilgha élin'ghan téxnikilarni Uyghur rayonidiki basturushliri üchün ishlitiwatqan bolush éhtimalliqi intayin yuqiri" dégen. U yene bundaq yuqiri derijilik téxnikilarning xitay armiyesini téxnika jehettin zamaniwilashturush we uchurlashturushni tézlitip, ularning 2049-yilighiche dunyadiki eng ilghar armiye bolush nishanigha yétishini tézlitidighanliqini eskertken.

Mikrosoft shirkiti bu heqte axbaratlargha qayturghan inkasida özlirining téxnika tereqqiyati üchün pütün dunyadiki alimlar bilen hemkarlishidighanliqini bildürgen.

Xitaygha gén uchurini retlesh üskünisi sétip bergen térmo fishir shirkitining weqesidin kéyin köpligen amérika siyasetchiliri amérika téxnika shirketlirining xitay bilen ornatqan hemkarliqlirigha qarita dölet kontrolluqini ashurushning zörürlükini tekitlep kelmekte.

Uyghurlargha munasiwetlik ikki qanun layiheside mana bu mesile alahide tekitlen'gen.

Toluq bet