Mayk pompéyo: "Jorj orwélning 1984 namliq kitabidiki qurlar shinjangda ré'alliqqa aylandi"

Muxbirimiz irade
2019-10-11
Élxet
Pikir
Share
Print

Amérika tashqi ishlar ministiri mayk pompéyo 11-öktebir küni amérikaning ténisi shtatining neshwil shehiridiki bir yighinda qilghan sözide yene Uyghurlarning weziyiti üstide toxtalghan.

Roytérsning xewer qilishiche, u yighinda xitay hökümitining Uyghur musulmanlirigha yürgüzüwatqan siyasitini jorj orwélning "1984" namliq kitabida teswirlen'gen tüzümge oxshitip "Xitay hökümiti bir milyondin oshuq Uyghur musulmanni lagérda tutqun qilip zorawanliq qilmaqta" dégen. 

U bu sözlerni neshwil shehiride échilghan amérika xristi'an kéngeshliri birlikining yighinida qilghan bolup, u bu heqtiki sözide "Shinjang rayonida jorj orwélning 1984 namliq kitabidiki mezmunlar ré'alliqqa aylanmaqta. Men NBA ning buni étirap qilishini tolimu ümid qilattim" dégen. 

Aldinqi hepte amérika NBA waskétbol guruppisi xongkong namayishini qollighan twittér sözi seweblik xitay hökümitidin kechürüm sorashqa mejbur bolghandin kéyin amérikada küchlük munazire qozghalghan we NBA ning Uyghur élide bir meshiq bazisi barliqidek mesilimu teng otturigha chiqip, uni taqash chaqiriqliri qilin'ghan. 

Amérika hökümiti we tashqi ishlar ministirliqi bu hepte Uyghur élidiki ghayet zor kishilik hoquq depsendichilikide rol alghan organ we shirketlerge we alaqidar shexslerge qarita jaza tedbirlirini élan qilghan idi. 10-Öktebir küni, amérika tashqi ishlar ministirliqining bayanatchisi morgan ortagus xanim mexsus bayanat élan qilip: "Xitay hökümitini Uyghur, qazaq we qirghiz qatarliq musulman milletlerge yürgüzüwatqan bésim siyasitini derhal ayaghlashturush" qa chaqirdi.

Toluq bet