Нәнниң-үрүмчи төмүрйол линийисидә «шинҗаңлиқларни мәлум қилиш» уқтуруши тарқалған

Мухбиримиз меһрибан
2016-01-12
Елхәт
Пикир
Share
Принт

Хитай һөкүмәт таратқулири 2016-йил 10-январдин башлап нәнниң-үрүмчи линийисидә биваситә тез пойиз қатниши башлинидиғанлиқини хәвәр қиливатқан мәзгилдә, иҗтимаий алақә торлирида тарқалған «шинҗаңлиқларни мәлум қилиш» уқтуруши муназирә қозғиди.

12-январ сәйшәнбә күни ов бявфиң исимлик бир тордаш мәзкур уқтурушниң фото копийиси билән «ким миллий өчмәнлик пәйда қиливатиду?» дегән сөзләрни «твиттер» ториға йоллиған. Қисқиғинә нәччә саәт ичидила тордашлар инкас йоллап, һөкүмәт даирилириниң «ашкара ирқчилиқ хаһишини ипадиләп, милләтләр арисида өчмәнлик пәйда қиливатқанлиқи» ни әйиблигән.

Уқтурушниң қайси орган тәрипидин тарқитилғанлиқи ениқ көрситилмигән болсиму, әмма уқтурушқа гуаңши җуаңзу аптоном райони нәнниң шәһири биңяң наһийиси литаң базири хәлқ һөкүмити, литаң базарлиқ сақчихана қатарлиқ орунларниң алақә номури йезилған.

«Нөвәттики террорлуққа қарши вәзийәтниң җиддийлики нәзәрдә тутулуп» чиқирилғанлиқи көрситилгән бу уқтурушта: «шинҗаңлиқларға өй иҗарә беришкә болмайду, шинҗаңлиқларға йемәклик вә кийим сетишқила болиду, пичақ, бензин, партлатқуч дора, кислата қатарлиқ кишиләрниң һаятиға хәтәр елип келидиған мәһсулатларни сетишқа болмайду, әгәр шинҗаңлиқларни көрсәңлар дәрһал базарлиқ хәлқ һөкүмити, базарлиқ сақчиханиға мәлум қилиңлар» дегән сөзләр йезилған.

Радиомиз уқтурушқа йезилған номурларға телефон қилған болсақму, телефон елинмиди.

Радиомиз зияритини қобул қилған хитай вәзийәт анализчилиридин чен покуң әпәнди, бу хил уқтурушларниң уйғурлардики қаршилиқ һәрикәтлирини көпәйтипла қалмастин, бәлки пүткүл хитайда миллий өчмәнлик вәзийити яритидиғанлиқини тәкитлиди.

Пикирләр (0)
Share
Толуқ бәт