Yerken nahiyeside “Ming ayal teshwiqatchi” herkiti bashlandi

Xitay hökümitining Uyghur diyaridiki siyasiy kontrolluqining yene bir wastisi yéqinda yéza ayallirini teshwiqat xizmitige sélishta öz ipadisini tapqan. “Tengritagh tori” ning bu heqtiki xewiride bu ehwal “Alahide yéngiliq” süpitide tilgha élin'ghan.

Xewerde éytilishiche, yerken nahiyelik hökümet ming kishilik ayal teshwiqatchilar qoshuni teshkilligen bolup, buningda “Partiyege rast gépini éytish” muhim téma qilinidiken. Bu “Ming kishilik teshwiqatchilar qoshuni” seperwerlik yighinida “Partiyege bolghan cheksiz méhri-muhebbitini ipadilesh arqiliq jungxu'a ortaq kimliki chüshenchisini ayallar we balilarning qelbige ornashturushqa küch chiqiridighanliqi” ni bildürgen.

Muhajirettiki analizchilar bu heqte pikir qilip, buning ilgiriki yillarda ewj alghan “Hemmila kishi özining burunqi siyasiy sewenliklirini pash qilish” herkitining bashqiche wariyanti ikenlikini, “Partiyege rast gépini qilghan Uyghurning aqiwiti lagir bolidighanliqi” ni alahide eskertti. Shuningdek erlirining qeyerde ikenliki namelum bolghan bu ayallar qoshuni arqiliq “Xitay hökümitining ‛jungxu'a ‍ortaq kimliki‚ chüshenchisini omumlashturmaqchi bolushi sépi özidin xitaylashturushni ashkara terghip qilishtin bashqa nerse emes,” dep körsetti.