Awstraliyediki Uyghurlar misirda ghayib bolghan Uyghurlar heqqide naraziliq xéti tapshurdi

• Muxbirimiz erkin
  2018-05-04

Awstraliyediki Uyghurlar 4‏-may küni misirning kanbérradiki elchixanisi aldida namayish qilip, misir da'irilirini Uyghurlarni tutqun qilish we xitay hökümitige ötküzüp bérishni toxtitishqa chaqirdi.

Misir hökümiti xitayning telipige bina'en 2017‏-yili 7‏-aydin bashlap Uyghurlarni keng kölemlik tutqun qilip, nurghun kishini xitaygha ötküzüp bergen. Xitaygha ötküzüp bérilgen Uyghurlarning bezilirining qamaq jazasigha höküm qilinip, türmide ölgenliki, bezilirining iz -déreksiz yoqalghanliqi yaki “Yépiq terbiyelesh lagérliri” gha solan'ghanliqi melum bolghan idi.

Namayishchilar jüme küni yene misir elchixanisigha awstraliyediki Uyghur jama'iti namidin naraziliq xéti tapshurup, misirning b d t musapirlar ehdinamisige emel qilishini, Uyghurlarni ular jazalinidighan yaki ten jazasigha uchraydighan döletlerge qayturmasliqni, iz déreksiz yoqap ketken we misir türmiliride tutup turuluwatqan Uyghurlarni ashkarilashni telep qilghan.

Naraziliq xétide, “Misir da'irilirining bu kishilik hoquq krizisida xitayning jinayitige ortaqlishishi peskeshlik, xelq'ara qanunlargha ri'aye qilmasliq we exlaqsizliq. Bu, Uyghurlarning éghir iztirap chékishige seweb boldi” déyilgen.

Naraziliq xétide yene, misir da'irilirining 2017‏-yili misirdiki bir qisim Uyghurlarni xitaygha ötküzüp bergenliki, xitaygha ötküzüp bérilgen bu Uyghurlarning bezilirining qamaqxanida ölgenliki yaki “Terbiyelesh lagérliri” gha ewetilip, jazalan'ghanliqi hem ten jazasigha uchrighanliqi bildürülgen.

Yéqinqi xewerlerde misir da'irilirining qélip qalghan Uyghurlarni dawamliq tutqun qiliwatqanliqi, yoshurunup yürgen Uyghurlarning nahayiti qiyin ehwalda yashawatqanliqi ilgiri sürülgen idi.

Awstraliye Uyghur jama'itining naraziliq xétide, misir hökümitining xelq'ara kishilik hoquq teshkilatlirining chaqiriqigha qulaq salmay, yoshurunup yürgen Uyghurlarni dawamliq tutqun qiliwatqanliqi tenqid qilin'ghan.