Misir konsérwatiplar partiyesi Uyghur oqughuchilirining xitaygha qayturuwélish weqesini tekshürüshni telep qilghan

Muxbirimiz erkin
2019-08-30
Share

Misir konsérwatiplar partiyesi yéqinda bayanat élan qilip, misirdiki Uyghurlarning tutqun qilinip, xitaygha qayturup bérilish weqesini tekshürüshni telep qilghan. "Bügünki misir" gézitining xewer qilishiche, misir konsérwatiplar partiyesi bu chaqiriqni 26‏-awghust küni élan qilghan bayanatida otturigha qoyghan.

Bayanatta, misir hökümiti Uyghurlarning xitaygha qayturup bérilgenlikige da'ir xewerlerning toghra-xataliqigha chüshenche bérishi, eger bu, xewerlerde éytilghandek toghra bolsa Uyghurlarni xitaygha qayturup bérip, ularning hayatini xeterge uchratmasliqqa, insanperwerlik we xelq'ara qanunlargha emel qilip, ularni qoghdashqa chaqirilghan. 

Misir hökümiti 2017‏-yili 7‏-ayning bashlirida misirda oquwatqan Uyghurlarni omumyüzlük tutqun qilip, xitaygha qayturghan. Buning bilen misirdiki nurghun Uyghurlar türkiye qatarliq döletlerge qéchip bérip panahlinishqa mejbur bolghan. Misir hökümitining bu herikiti eyni waqitta xelq'ara jama'etning qattiq tenqidige uchrighanidi. 

Misir konsérwatiplar partiyesining néme üchün bu weqedin ikki yil kéyin bayanat élan qilip, Uyghurlarni qoghdashni telep qilghanliqi melum emes. Mezkur partiyining bayanatida, b d t we xelq'ara teshkilatlarning doklatlirida xitayning musulman Uyghurlarni xalighanche tutqun qilish, ten jazasi, siyasiy sotlash, bir milyondin artuq kishini lagérlargha qamash qatarliq wasitiler arqiliq ularning kishilik hoquqi, diniy erkinlikini ochuq-ashkara depsende qiliwatqanliqi qeyt qilin'ghanliqi tekitlinip, "Ularning kemsitishke uchrishi bizde, Uyghurlar qayturulsa, ten jazasi we jazalashqa, heq-hoquqi depsende qilinishqa uchraydu, dégen endishe peyda qilmaqta" déyilgen. 

Chet'el taratqulirining yéqinda ashkarilishiche, shu qétimqi tutqunda 90 nechche Uyghurning xitaygha ötküzüp bérilgenliki melum iken. Bu heqtiki xewerlerde shu qétimqi tutqundin kéyin misirda turushluq 6 mingdek Uyghurdin peqet 50 tek a'iliningla qalghanliqi ilgiri sürülgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet