Xitay hökümiti misirda “Shinjang yaxshi jay” tor teshwiqat pa'aliyiti uyushturghan

Xitay hökümiti yiéqindin buyan Uyghur élige munasiwetlik teshwiqat heriketlirining bir qismi süpitide misirda “Shinjang yaxshi jay” namliq bir tor yighini uyushturghan.

Xitayning tengriـtagh torining bu heqtiki xewiridin qarighanda, 30-iyul küni ötküzülgen bu teshwiqat yighinini Uyghur rayonluq hökümet we xitayning misirda turushluq bash elchixanisi birlikte ötküzgen, yighinda Uyghur rayonluq hökümetning mu'awin re'isi erkin tuniyaz we bir qisim diniy zatlar Uyghur élining atalmish muqim weziyiti, tereqqiyati we diniy inaqliq weziyiti heqqide söz qilghan.

Undin sirt yene, shinjang Uyghur aptonom rayonluq xelq qurultiyi da'imiy komitétining mu'awin mudiri li shöjün amérika we gherbni eyiblep “Hazir, dunyadiki chüshinishlik kishiler barghanséri shinjanggha munasiwetlik yalghanchiliqlarni amérika we gherbtiki xitaygha qarshi küchlerning oydurup chiqqanliqini tonup yetti. Amérika we gherbtiki xitaygha qarshi küchlerning qebih muddi'asi muweppeqiyet qazinalmaydu” dégendek sözlerni qilghan.

Xitay hökümiti 2017-yili Uyghurlargha keng kölemlik tutqun herikitini bashlighanda misir hökümitining biwasite maslishishi bilen misirda oquwatqan we yashawatqan yüzlerche Uyghur tutqun qilin'ghan. Ularning nurghunlirining hazirghiche héchqandaq iz-dériki yoq. Misir hökümiti hazirghiche xitay hökümitining Uyghur élida yürgüzüwatqan siyasetlirini b d t qatarliq xelq'araliq organlarda qollap kelmekte.

Xewerde ilgiri sürülüshiche, yighin'gha misir hökümet emeldarliri, muxbirlar we tetqiqat orunlirining tetqiqatchiliri qatnashqan bolup, ularmu bir éghizdin Uyghur élining tereqqiyatini, u yerdiki “Bextiyar” hayatni maxtashqan.

Xitayning misirda turushluq bash elchisi lyaw lyangyang bolsa misirliqlarni Uyghur élige bérip sayahet qilip öz közi bilen körüp kélishke dewet qilghan.