Моңғулийәдики еғир муһит булғиниш моңғул аһалилирини тәшвишкә салмақтикән

Бирләшмә агентлиқниң хәвәр қилишичә, 12-айниң 26-күни моңғулийә пайтәхти уланбатурда йүзлигән шәһәр аһалиси йиғилип, муһиттики еғир булғиниш һәққидә наразилиқ намайиши өткүзгән.

Намайишчилар, моңғулийә даирилириниң муһит асраш бойичә үнүмлүк тәдбир алалмиғанлиқи, еғир дәриҗидә булғанған һаваниң балилар вә яшанғанларниң һаятиға хирис елип кәлгәнликини билдүргән.

Нөлдин төвән 20 селсийә градус соғуқта елип берилған бу намайиш хәлқара таратқуларниң диққитини чәккән. Намайишчилар, “ис-түтәк әң чоң қатилдур”, “кәлгүси әвладлиримизға сап һава тәләп қилимиз” дегән шоарларни товлап, моңғул даирилириниң муһит һәққидә ипадә билдүрүшини тәләп қилған.

Игилинишичә, уланбатор дунядики әң соғуқ пайтәхт шәһәр болуп, қиш мәзгилидики әң төвән температуриси бәзидә нөлдин төвән 40 селсийә градусқа чүшидикән. Йеқинқи йиллардин буян сүний рәвиштики һава булғиниш түпәйли 1 милйон 300 миң аһалигә игә уланбатурда қиш мәзгилидә еғир дәриҗидә ис-түтәк чүшүш әһвали көрүлмәктикән. Бу һал мәзкур шәһәрдики 5 яштин төвән балилар арисида нәпәс йоли яллуғи билән өпкә кесәлликини қозғап, көплигән балиларниң өлүп кетиши кәлтүрүп чиқарған.