Mongghuliye arxé'ologliri onun deryasi boyidin chinggizxanning qebrisini tapqanliqini ilgiri sürgen

Muxbirimiz qutlan
2014.11.10
Share on WhatsApp
Share on WhatsApp


Dunya xewerliri torining 6 - noyabirdiki uchurigha qarighanda, mongghuliye arxé'ologliri chet'el mutexessisliri bilen birlikte onun deryasining kona éqinidin 13 - esirdiki mongghul impiratori chinggizxanning qebrisini tapqanliqini ilgiri sürgen.

Melum bolushiche, mongghuliye yol yasash ishchiliri onun deryasi boyida yol yasawétip mezkur qebrilerni bayqighan. Arqidinla mongghuliye arxé'ologliri béyjing uniwérsitétining mutexessisliri bilen birlikte mezkur qebrilerni achqan.

Qebriler eslide onun deryasining kona éqini astida bolup ikki qewet qilip yasalghan. Üsti qewitige nechche onlighan at, leshker we xizmetchiler qurbanliq qilip kömülgen. Asti qewitidiki chong qebridin bir bestlik erkekning iskiliti bilen uninggha hemdepne qilin'ghan 16 ayalning iskiliti bayqalghan. Qebridin yene zor miqdardiki altun, kömüshler tépilghan.

Perez qilinishiche, nechche yüz yillar mabeynide mezkur qebriler onun deryasining éqini astida pinhan saqlan'ghan. 18 - Esirde onun deryasi éqinini yötkigendin kéyin andin quruqluqqa chiqqan.

Arxé'ologlar mezkur qebridiki asasliq iskilitni analiz qilish arqiliq uning 60 yashtin 75 yash ariliqidiki er kishi ikenlikini, ölgen yil dewrining miladiye 1215 - yilidin 1235 - yilliri ariliqigha toghra kélidighanliqini békitken. Mutexesssiler mezkur qebrige hemdepne qilin'ghan köp sandiki leshker we qiz - ayallar shuningdek zor miqdardiki altun, kömüshler uning shek - shubhisizki 13 - esirdiki meshhur mongghul impiratori chinggizxanning qebrisi ikenlikini körsitip turidu dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.