Xitay qatarliq döletler jama'et pikrini monopol qilishta sün'iy eqil téxnikisini qollanmaqta

Amérikadiki OpenAI yeni “Ochuq sün'iy eqil” namliq bir tetqiqat ornining élan qilghan eng yéngi doklatida körsitishiche, xitay, rusiye, iran qatarliq döletlerni baza qilghan tor teshwiqat heriketliri jama'et pikrini monopol qilishta sün'iy eqil téxnikisini qollanmaqta iken. Doklatta, bu yaman gherezlik tor aktiyorlirining ChatGPT ni öz ichige alghan sün'iy eqil qorallirini ishlitip, ijtima'iy alaqe supilirida köp xil tillarda pikir bayan qilidighanliqi, yalghan isim we terjimihal yasap chiqip, saxta hésab achidighanliqi, karton we bashqa imaglarni sizidighanliqi we xata kodlarni yasaydighanliqi bildürülgen.

Amérika döletlik ammiwi radiyosi (NPR)ning bildürüshiche, bu doklat “Ochuq sün'iy eqil” tetqiqat ornining bu jehettiki tunji doklati iken.

Nöwette, “Ochuq sün'iy eqil” tetqiqat orni sün'iy eqil téxnikisida aldinqi orundiki shirketlerning biri bolup, uning yasap chiqqan ChatGPT sün'iy eqil yumtali 2022-yili 11-ayda xelqning ishlitishige sunulghandin buyan, abuntlirining 100 milyondin éship ketkenliki melum bolmaqta. Bu doklat xitayning yéqinqi waqitlardin béri, tashqi dunyagha “Shinjangning yaxshi hékayisi” ni sözlesh herikitini téximu kücheytip, chet'el ijtima'iy taratqu supilirida Uyghurlargha a'it ijabiy mezmunlarni téximu keng tarqitiwatqan, Uyghurlarning “Normal yashawatqanliqi” ni keng teshwiq qiliwatqan bir waqitta élan qilin'ghan.

Doklatta körsitilishiche, sün'iy eqil téxnikisi tor teshwiqatchilirining téximu köp mezmunlarni tarqitishigha qolayliq yaratsimu, téximu az xataliq sadir qilishigha yardem qilsimu, lékin u heqiqiy tor abuntlirining anche diqqitini qozghiyalmighan yaki tarqilishimu bek cheklik bolghan. Doklatta, Spamouflage namliq xitay tor hésabining shu xil sün'iy eqil tor teshwiqat supiliridin biri ikenliki, uning sün'iy eqil arqiliq xitay öktichilirini nishan qilidighanliqi bildürülgen. Melum bolushiche, féyisbukning igisi bolghan méta shirkiti ötken yili Spamouflage ning hazirgha qeder ashkarilan'ghan xitay bixeterlik tarmaqlirigha chétishliq eng chong teshwiqat tori ikenlikini éytqan iken.