Хитай қатарлиқ дөләтләр җамаәт пикрини монопол қилишта сүний әқил техникисини қолланмақта

Вашингтондин мухбиримиз әркин тәйярлиди
2024.05.31

Америкадики OpenAI йәни “очуқ сүний әқил” намлиқ бир тәтқиқат орниниң елан қилған әң йеңи доклатида көрситишичә, хитай, русийә, иран қатарлиқ дөләтләрни база қилған тор тәшвиқат һәрикәтлири җамаәт пикрини монопол қилишта сүний әқил техникисини қолланмақта икән. Доклатта, бу яман ғәрәзлик тор актийорлириниң ChatGPT ни өз ичигә алған сүний әқил қораллирини ишлитип, иҗтимаий алақә супилирида көп хил тилларда пикир баян қилидиғанлиқи, ялған исим вә тәрҗимиһал ясап чиқип, сахта һесаб ачидиғанлиқи, картон вә башқа имагларни сизидиғанлиқи вә хата кодларни ясайдиғанлиқи билдүрүлгән.

Америка дөләтлик аммиви радийоси (NPR)ниң билдүрүшичә, бу доклат “очуқ сүний әқил” тәтқиқат орниниң бу җәһәттики тунҗи доклати икән.

Нөвәттә, “очуқ сүний әқил” тәтқиқат орни сүний әқил техникисида алдинқи орундики ширкәтләрниң бири болуп, униң ясап чиққан ChatGPT сүний әқил юмтали 2022-йили 11-айда хәлқниң ишлитишигә сунулғандин буян, абунтлириниң 100 милйондин ешип кәткәнлики мәлум болмақта. Бу доклат хитайниң йеқинқи вақитлардин бери, ташқи дуняға “шинҗаңниң яхши һекайиси” ни сөзләш һәрикитини техиму күчәйтип, чәтәл иҗтимаий таратқу супилирида уйғурларға аит иҗабий мәзмунларни техиму кәң тарқитиватқан, уйғурларниң “нормал яшаватқанлиқи” ни кәң тәшвиқ қиливатқан бир вақитта елан қилинған.

Доклатта көрситилишичә, сүний әқил техникиси тор тәшвиқатчилириниң техиму көп мәзмунларни тарқитишиға қолайлиқ яратсиму, техиму аз хаталиқ садир қилишиға ярдәм қилсиму, лекин у һәқиқий тор абунтлириниң анчә диққитини қозғиялмиған яки тарқилишиму бәк чәклик болған. Доклатта, Spamouflage намлиқ хитай тор һесабиниң шу хил сүний әқил тор тәшвиқат супилиридин бири икәнлики, униң сүний әқил арқилиқ хитай өктичилирини нишан қилидиғанлиқи билдүрүлгән. Мәлум болушичә, фейисбукниң игиси болған мета ширкити өткән йили Spamouflage ниң һазирға қәдәр ашкариланған хитай бихәтәрлик тармақлириға четишлиқ әң чоң тәшвиқат тори икәнликини ейтқан икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.