Xitayning moskwadiki elchixanisi aldida namayish ötküzülüp, lagérlarni taqash telep qilindi

Muxbirimiz erkin
2018-12-21
Élxet
Pikir
Share
Print

21‏-Dékabir küni xitayning rusiye fédératsiyesining paytexti moskwadiki elchixanisi aldida Uyghur, türk we özbékler namayish qilip, Uyghur rayonidiki yighiwélish lagérlirini taqashni, lagérdiki tutqunlarni derhal qoyup bérishni telep qilghan.

Moskwadiki namayish oxshash mezgilde hindonéziye, malaysiya, türkiye, gérmaniye, amérika qatarliq döletlerde ötküzülgen lagérlargha qarshi ötküzülgen namayishlar zenjirining bir halqisur. Moskwadiki namayishqa texminen 10 ‏-15dek adem qatnashqan bolsimu, lékin bu namayishning 1940‏-yillirida Uyghurlarning qoralliq inqilabini qollap, "Sherqiy türkistan jumhuriyiti" ning qurulushigha yardem bergen, lékin hazir xitay bilen yéqin munasiwettiki rusiyedek bir dölette ötküzülüshi alahide diqqet qozghidi.

Buning sel aldida rusiyening "Bügünki rusiye" téléwiziye qanili amérikidiki Uyghur pa'aliyetchi roshen abbasni ziyaret qilghan idi. U lagérdiki tutqunlar heqqide toxtilip, bu peqet "Amérika hökümitila sehnige élip chiqishi kérek bolghan mesile emes, belki pütün dunya diqqet qilishqa, heriket qollinishqa tégishlik bir mesile" dégen idi. Melum bolushiche, moskwadiki namayishta namayishchilar xitayning Uyghur rayonida qurghan yighiwélish lagérlirini taqashni, Uyghur qatarliq milyonlighan musulman tutqunlarni qoyup bérishni telep qilghan. Namayishqa moskwadiki Uyghur pa'aliyetchilerdin shérip exmedof qatarliqlar riyasetchilik qilghan. Namayish heqqide rusiyening "Ré'al zaman" xewer agéntliqi süretlik xewer tarqatqan. Ijtima'iy taratqulardiki xewerlerdin melum bolushiche, nöwette rusiyening tataristan jumhuriyitidiki tatar pa'aliyetchiler 22‏-dékabir küni qazan shehiride lagérlargha qarshi namayish qilishqa teyyarliq qilmaqta iken.

Toluq bet