Muhemmet bin salman xitayning “Shinjang siyasitini qet'iy qollaydighanliqi” ni bildürgen

• Muxbirimiz erkin
  2022-04-18

Xelq'ara kishilik hoquq teshkilatliri we muhajirettiki Uyghurlar se'udi da'irilirini tutqundiki 4 neper Uyghurni xitaygha qayturmasliqqa chaqiriwatqan bir waqitta, se'udi erebistan weli'ehd shahzadisi muhemmet bin salman xitayning “Shinjang siyasitini qet'iy qollaydighanliqi” ni bildürgen. Xongkongda chiqidighan “Jenubiy xitay seher pochtisi” gézitining 16-aprél xewer qilishiche, muhemmet bin salman bu sözlerni ötken jüme küni, yeni 15-aprél xitay re'isi shi jinping bilen téléfon sözleshkende shi jnpinggha éytqan.

“Jenubiy xitay seher pochtisi” gézitining xitay da'irilirining bayanatidin neqil keltürüshiche, söhbette shi jinping bilen muhemmet bin salman ukra'ina mesilisi heqqide pikir almashturush bilen bir waqitta, ikki döletning achquchluq tereqqiyat pilanlirini öz ara qollashqimu kélishken. Xewerde, ukra'ina urushi yéqilghu bahasining örlep kétishini keltürüp chiqarghan bir waqitta, shi jinpingning muhemmet bin salman'gha xitay énérgiye saheside se'udi erebistan bilen bolghan “Yuqiri sewiyediki hemkarliqni saqlap qalidu” dégenliki, shundaqla “Se'udi erebistan bilen bolghan munasiwetning tereqqiyatini aldinqi orun'gha qoyidighanliqi” ni éytqanliqi tekitlen'gen.

“Jenubiy xitay seher pochtisi” ning éytishiche, xitayning mezkur téléfon söhbitige a'it bayanatida, muhemmet bin salmanning se'udi erebistanning xitayning shinjangdiki siyasitini “Qet'iy qollaydighanliqi”, shundaqla xitayning ichki ishlirigha arilishishqa qarshi turidighanliqini bildürüp, “Her bir dölet özining siyasiy we kishilik hoquq yolida méngish heqqi bar” dégenliki bildürülgen. Muhemmet bin salmanning shi jinping bilen bolghan téléfon söhbiti se'udi hökümiti xelq'araning bésimida tutqundiki bir Uyghur ayal bilen uning 13 yashliq qizini öz ichige alghan töt neper Uyghurni xitaygha qayturup bérishni waqitliq toxtitip arqidinla ötküzülgen.