Uyghur diyari xitayning tashqi soda ékisportida muhim bazilardin bolmaqta

Xitay hökümiti bashqurushidiki “Xelq tori” ning 19-marttiki xewiride éytilishiche, Uyghur aptonom rayonluq hökümetning re'isi erkin tuniyaz we partkom sékrétari ma shingruy aldinqi küni qazaqistan soda ministiri almasadam setqaliyéw (Almasadam Sätqaliev) bilen ürümchide mexsus söhbetleshken. Söhbette ikki dölet rehberlirining arzusi boyiche xitay-qazaqistan munasiwitini, bolupmu ikki terep otturisidiki soda munasiwitini kücheytish muhim muzakire témisi bolghan.

Xewerde éytilishiche, ma shingruy alahide qilip xitay-qazaqistan munasiwitini her ikki terep üchün menggülük istratégiyelik hemkarliq munasiwitige aylandurushning muhimliqini, buningda Uyghur diyarining muhim soda shériki bolidighanliqini eskertken. Shuningdek “Partiyemiz yéngi dewrdiki shinjangni idare qilish siyasitini toluq we keng kölemlik ijra qiliwatqanda, bu rayon ‛bir belwagh bir yol qurulushi‚ning yadroluq rayoni bolush süpiti bilen ikki terep munasiwiti üchün köwrüklük rol oynaydu” dégen. Buning bilen, ikki terep otturisidiki iqtisadiy saheni chöridigen hemkarliq we dostluqning buningdin kéyin téximu küchiyidighanliqidin bésharet bérilgen.

Xitay hökümitining ottura asiya bilen bolghan soda pa'aliyetliri özbékistandimu tézdin janliniwatqan bolup, “Özbékistan-xitay (shinjang) soda yermenkisi” 30-marttin 1-aprélghiche tashkent shehiride ötküzülidiken. Xitay bashqurushidiki “Shinjang géziti” ning bu yermenke toghrisida bergen xewiride, “Shinjangdiki we shinjanggha yardem bérishke kelgen shirketler üchün bu bir qétimliq zor soda pursiti” déyilgen.

“Shinxu'a agéntliqi” ning 19-marttiki xewiride éytilishiche, Uyghur diyarining tashqi soda miqdari 2024-yilining aldinqi ikki éyida ötken yilning oxshash mezgilige sélishturghanda 51 pirsenttin köprek ashqan. 63 Milyard somdin köprek (texminen toqquz milyard amérika dolliri) tashqi soda miqdarining mutleq köp qismi ottura asiyadiki besh jumhuriyet bilen bolghan soda pa'aliyetlirini menbe qilghan.

Yéqindin buyan xitayning tashqi dunya bilen bolidighan soda pa'aliyetliri oxshimighan cheklimilerge we jaza tedbirlirige duch kéliwatqanda, Uyghur diyari ularning muhim ishlepchiqirish bazisi we tashqi soda közniki bolup kéliwatqanliqi melum. Xitay hökümiti yéqinda Uyghur diyarida “Erkin soda sinaq rayoni” qurulushini bashlighan bolup, buningdimu Uyghur diyarini baza qilghan halda yawropa bazirigha kéngiyish axirqi nishan qilin'ghan, dep qaralmaqta.