Mujahid yüsüpning Uyghurlar heqqidiki bayanlirigha qarita tenqid yaghdi

Malaysiyaning islam ishliri ministiri mujahid yüsüp rawa özining xitaydiki sekkiz künlük ziyaritidin kéyin milyonlighan Uyghurlar qamalghan yighiwélish lagérliri heqqide söz qilip: “Men ziyaret jeryanida shuni kördümki, bu orunlar meshiq we kespiy maharet merkizi iken” dégen idi. Shuningdin kéyin uning lagérlar heqqidiki bu bayanlirigha terep-tereptin tenqidler yéghishqa bashlidi.

Buninggha deslep bolup xelq'ara kechürüm teshkilatining malaysiya tarmiqi qattiq naraziliq bildürdi hemde uni qarap turup yalghanni toqughan, dep eyiblidi. Ular bu heqte söz qilip: “Uyghurlar duch kéliwatqan ishlar heqqide biz birinchi qol melumatlargha ige. Xitay kompartiyesige sadiq emes, dep qaralghanliki kishiler hazir terbiyelesh lagérlirigha qamiliwatidu” dégen.

Buningdin bashqa “Erkin malaysiya” géziti, “Démokratik heriket partiyesi” qatarliqlarmu mujahid yüsüpning bayanlirini qattiq tenqidligen. Ku'alalumpurdiki “Islam güllinish fronti” ning qurghuchisi exmed faruq musa bu heqte söz qilip “Mujahid yüsüp roshenki xitay kompartiyesining teshwiqat qurbani bolup ketken” dégen.