Xitay “Mulen” filimi heqqide xewer bérishni chekligen

Roytérs agéntliqining bügünki xewirige qarighanda, xitay hökümiti xitaydiki axbarat wastilirigha “Mulen” filimge a'it héchqandaq xewer tarqatmasliq heqqide buyruq chüshürgen.

Roytérs agéntliqi buni az dégende üch menbedin jezmleshtürgen bolup, xitay da'irilirining néme üchün bundaq qarar alghanliqi éniq emesken. Biraq roytés agéntliqi xewiride disnéyning hazir bu filimni jaza lagérliri mewjut turpanda süretke alghanliqtin zor bésim astida qalghanliqini qeyt qilghan. “Mulen” filimi üchün disnéy 200 milyon dollar meblegh salghan bolup, disnéy shirkiti bu filim arqiliq xitaydin zor payda qazinishni ümid qiliwatqan iken.

Amérikadiki tonulghan xitay ishliri tetqiqatchisi gordon chang tiwittérge bu heqte inkas yézip: “‛mulen‚ filimi xitayda közligen paydini alalmaydighandek turidu. Chünki xitay bu filim heqqide xewer tarqitishni chekleptu. Disnéy wijdanini bikargha satqan boldi. Biraq biz ‛mulen‚ ni bayqut qilishni dawamlashturimiz,” dégen.

Disnéy shirkitining oxshimighan döletlerdiki kishilik hoquq mesililirige oxshimaydighan mu'amilide boluwatqanliqi, yeni ikki xil ölchem qoyuwatqanliqi mesxire témisi bolmaqta. Amérikadiki “Babilon herisi” namliq tor betmu bu heqte kinayilik xewer élan qilip, disnéy shirkitining pulni dep xitaydiki jaza lagérliri yénida filim süretke alghanliqini tenqid qildi.