Besh rehbiri kadir “Muqimliq xizmitini yaxshi ishlimeslik” sewebi bilen chare körüshke uchrighan

Yéqinda ürümchi shehiri da'iriside bir qisim kadirlar muqimliq xizmitini emeliyleshtürüshte mes'uliyitini yéterlik ada qilalmighanliqi sewebi bilen chare körüsh jazasigha uchrighan.

Ürümchi sheherlik partkom intizam tekshürüsh komitéti ürümchi shehiridiki muqimliq xizmitini yaxshi ishlimigenliki sewebidin jaza bergen besh neper rehbiriy kadirning ismini we jazalinish sewebini körsetken.

“Ürümchi kechlik géziti”ning bu heqtiki uchuridin melum bolushiche, jazagha uchrighan mezkur besh kadirning bir nepiri xitay, qalghan töt nepiri Uyghur bolup,bularning ichide ürümchi sheherlik 3-ottura mektepning xitay mektep bashliqi bilen Uyghur partiye sékrétari“Muqimliqni qoghdash xizmitige ehmiyet bermigen”, “Mektepke kirip-chiqqanlarni qattiq tekshürmigen” dégendek eyiblesh bilen partiye ichide agahlandurush, memuriy jehettin chare körüsh xatirisi turghuzush jazasigha uchrighan.

Qalghan üch neper Uyghur kadirning hemmisi ürümchi shehirige qarashliq bezi idarilerning mes'ulliri bolup, ular yene hem ayrim-ayrim halda döngköwrük meschiti, yangxang meschiti we bashqa meschitning bashqurush komitétlirining mudiriliq wezipilirinimu atqurghan iken. Ular oxshashla “Muqimliqni qoghdash xizmitige ehmiyet bermigen”,“Mes'uliyitini toluq ada qilmighan”, “Meschitning amanliq bashqurush xizmitini yéterlik ishlimigen” dégendek eyibleshler bilen partiye ichide agahlandurush we memuriy jehettin chare körüsh xatirisi turghuzush jazasigha uchrighan.

Uchur wasitiliridin melum bolushiche, téxi yéqinda xotendimu 97 kadirmu muqimliqni qoghdash mesililiri tüpeylidin jazalashqa uchrighan bolup, ularning mutleq köp qismi Uyghur kadirlar idi.