Keshmirge qéchip chiqqan 3 Uyghur musapiri hindistandin siyasiy panahliq tiligen

2013‏-Yili ladaq yoli arqiliq hindistanning jamu-keshmir rayonigha qéchip chiqqan 3 neper Uyghur jamu-keshmir yuqiri sotigha erz sunup, siyasiy panahliq sorighan. “Büyük keshmir” gézitining xewer qilishiche, adil, abduxaliq we abdusalam isimlik 3 Uyghur musapir 2013‏-yili 6‏-ayda ladaq yoli arqiliq hindistan kontrolluqidiki jamu-keshmirge qéchip chiqqan.

Ular ladaqning lé rayoni sultan chusu, dégen yéride hindistan armiyesining qoligha chüshüp, eskerler ularni hindi-tibet chégra saqchilirigha ötküzüp bergen. Ular saqchining tekshürüshidin kéyin shu yili 8‏-ayda hindistan chet'ellikler qanunigha xilapliq qilish bilen eyiblinip sotlan'ghan we bir yérim yilliq qamaq jazasigha höküm qilin'ghan.

“Büyük keshmir”gézitining bildürüshiche, ularning jaza mudditi 2015‏-yili 1‏-ayda toshqan bolsimu, emma hindistan qanunigha asasen dawamliq tutup turulghan. Ular jamu-keshmir jem'iyet bixeterlik qanunidiki chégradin qanunsiz kirgen chet'elliklerni öz dölitige qayturulghiche dawamliq nezerbend qilish körsetmisi boyiche tutup turulghan. Emma Uyghur musapirlar nezerbend astida turup, jamu-keshmir yuqiri sotigha siyasiy panahliq erzi sun'ghan.

Uyghur musapirlirining adwokati sachin gupta “Büyük keshmir” gézitige bergen uchurida, hindistan we jamu-keshmir hökümitini ularning panahliq erzini qobul qilishqa chaqirghan. Uyghur musapirlar jamu-keshmir yuqiri sotigha sun'ghan erzide, “Uyghurlarning kishilik hoquqigha xitay hökümiti we jem'iyiti teripidin xilapliq qiliniwatidu” dep körsitip, eger ular xitaygha qayturup bérilse, jazalinidighanliqini, hetta ölüm jazasigha höküm qilinishi mumkinlikini agahlandurghan.