Xitay tor betliride musulmanlargha qiliniwatqan hujum xelq'ara metbu'atlarning diqqitini qozghidi

Muxbirimiz irade
2016-09-15
Élxet
Pikir
Share
Print

Xitaydiki bir qisim tor betlerde ochuq-ashkara halda musulmanlargha qarshi qiliniwatqan haqaret xaraktéridiki munaziriler chet'el axbaratlirining diqqitini qozghidi.

Bu heqte "Diplomat" zhurnili we en'gliye "Ékisprés" gézitining xewerliridin qarighanda, xitayning resmiy xewer agéntliqliri we dölet téléwiziyiside musulmanlar heqqide bériliwatqan intayin éhtiyatchan xewerlerning eksiche, xitaydiki erkin munazire tor betliride musulmanlargha bolghan zor öchmenlikni körüwélish mumkin iken.

"Ékisprés" géziti bu heqtiki xewiride "Xitayda yashawatqan 20 milyon musulman ahalisi xitay hökümitining dini bésim siyasiti bilen intérnéttiki tor jama'itining öchmenliki arisida qaldi" dep yazghan. Ular shundaqla xitay tor qollan'ghuchilirining dunya döletliri yüzliniwatqan musapirlar krizisigha tutuwatqan mesxirilik pozitsiyisigimu diqqet qilghan.

Xewerde éytilishiche, xitay tordashlar birdek yawropa döletlirining süriyelik panahlan'ghuchilarni qobul qiliwatqanliqini qattiq mesxire qilghan. Bolupmu, ötken yil ichide bir milyondin oshuq musapir qobul qilghan we dawamliq qobul qilishni qarar qilghan gérmaniye bash ministiri an'géla mérkél küchlük mesxire obyékti bolghan.

Ular bu heqtiki mulahiziliride "Pütkül yawropa döletliri bir qanche yil ichide musulman dölitige aylinip kétidu" dégen, beziler hetta "Pütün musulman musapirlar yawropagha kétip, bolsa téximu jiq térror hujumi qilsun" dégendek sözlermu qilghan.

Intérnét torida yene xitay tordashlarning musulmanlarni"Yéshillar", "Yéshil renglikler" dégendek ibariler arqiliq sherhlewatqanliqimu melum bolghan.

Xitay puqraliri arisidiki mushuninggha oxshash irqchiliq xahishi téxi yéqinda en'gliyege uchidighan "Junggo awi'atsiyisi" ge munasiwetlik ayropilanlardiki yoluchilargha bérilidighan bixeterlik körsetküchiliridimu öz ipadisini tapqan idi.

Uningda, yoluchilarning londondiki qara tenlikler, pakistanliqlar we hindistanliqlardin yiraq turushqa, ularning mehellilirige yolimasliqqa agahlandurulghan idi. Bu xewermu xelq'arada küchlük inkas qozghighan.

Toluq bet