Mutellip imin özini soraq qilghan saqchilarning kimlikini ashkarilidi

2013-Yili 15-iyul küni weten ziyaritidin qaytish sepiride béyjing ayrodromida saqchilar teripidin mexpiy tutqun qilinip, 79 kün soraq qilin'ghan oqughuchi mutellip imin 24-dékabir yene Uyghurbiz tori, twitér qatarliqlarda 5-qétimliq ochuq xétini élan qilip, özini soraq qilghan saqchilarning kimlikini we saqchilar teripidin tartiwélin'ghan nersilerning tizimlikini ashkarilidi.

Mutellip imin bu qétimqi ochuq xétide 79 kün jeryanida uni tutush we soraq qilishqa qatnashqanlardin kimlikini bilidighanlarning ismini ashkarilighan. Ular dilshat, memtimin, jaw jidüy, kérem, abdubari qatarliqlar bolup, mutellip imin xétide eyni chaghda soraqqa qatnashqan yene 10 nechche saqchining kimlikining özige uqturulmighanliqini we soraq jeryanida özining kishilik heq-hoquqliri depsende qilin'ghan bezi tepsilatlarni we saqchilar teripidin tartiwélin'ghan nersilerning tizimlikini élan qilghan.

Mutellip imin bundin ilgiriki ochuq xetliride özining Uyghur élidiki saqchi da'iriliri teripidin héchqandaq qanuniy resmiyet bolmighan ehwal astida 79 kün tutup turulghanliqi we qoyup bérilgendin kéyinmu pasporti we kimliki tartiwélinip, xotendiki a'ilisige nezerbend qilinip, türkiyege qaytip oqushini dawamlashturush pursitidin mehrum qilin'ghan ehwallarni pash qilip, xelq'ara jem'iyetke muraji'et qilghan idi.