2016-Йиллиқ әң надир кишилик һоқуқ хәвәрлири тизимликидә уйғурларға аит мақалиләрму орун алди

Америкадики “медюм” хәвәрләр тори 2016-йилидики “әң надир кишилик һоқуқ хәвәрлири” ни баһалап чиққан болуп, униңда радийомиз мухбири қутланниң “ғәрб дунясидики уйғурлар-миллий кимлик вә өзлишиш” сәрләвһилик чатма мақалилири орун алди.

Мәзкур тор бәттики хәвәргә берилгән ениқлимида, әркин асия радиоси мухбири қутланниң бу пәвқуладдә программисиниң хитай коммунистлириниң зулумидин қечип чәтәлләрдә мусапир болған уйғурларниң оттура асия вә ғәрб әллиригә олтурақлишиш җәрянлирини интайин яхши йорутуп бәргәнлики, программа арқилиқ чәтәлләргә қечип чиққан уйғурларниң уйғур миллий кимликиниң тиклинишидә зор рол ойниғанлиқини көрүш мумкинлики баян қилинған.

Мәзкур “надир кишилик һоқуқ хәвәрлири” дә йәнә, давид лагуә, паул моонәй қатарлиқлар язған вә ройтерс агентлиқида елан қилинған “хитай чәтәлләрдики уйғур көчмәнләрни юртидики аилиси арқилиқ контрол қилмақта” мавзулуқ мақалиму орун алған. Мақалидә, канадада яшайдиған әркин қурбан вә шундақла германийәдики д у қ баш катипи долқун әйсаларниң һекайилири арқилиқ хитай һөкүмитиниң чәтәлләргә қечип чиққан уйғурларниму бош қоювәтмәй, уларни юртидики уруқ-туғқанлириға бесим ишлитиш йоли билән контрол қилишқа, улар үстидин җасуслуқ қилишқа урунуватқанлиқидәк пакитлар йорутуп берилгән иди.