Sana'etleshken 7 dölet maliye ministirliri italiyede xitayning “Naheq” sana'et siyasitige qarshi tedbir élishni muzakire qilidu

Amérikani öz ichige alghan sana'etleshken yette démokratik döletning maliye ministirliri 24-may künidin bashlap italiyening stérésa shehiride ikki künlük yighin bashlighan.

Roytérs agéntliqining bildürüshiche, bu qétimliq maliye ministirliri yighinining küntertipidiki nuqtiliq téma, ukra'inagha qerz pul bérishte we xitayning “Naheq” sana'et ishlepchiqirishi siyasitige qarshi turushta ortaq birliksep shekillendürüshni muzakire qilish iken. Bu yighin amérika maliye ministiri jénét yélénning yéqinda xitayni uning sana'et éshincha mehsulatliri heqqide agahlandurup, dunyaning xitay sana'et éshincha mehsulatlirini istémal qilip bolalmaydighanliqi, uning dunya iqtisadigha buzghunchiliq qilidighanliqini keskin rewishte agahlandurushi we baydén hökümitining ötken hepte xitay mallirigha tamozhna béjini köpeytish pilanini élan qilishining arqisidinla ötküzülmekte.

Roytérs agéntliqining bildürüshiche, amérika maliye ministiri jénét yélén 23-may küni qilghan sözide, amérikining sana'etleshken yette dölet guruhidiki yaponiye, gérmaniye, firansiye, en'gliye, kanada italiye qatarliq ittipaqdashlirining washin'gton bilen birge turushini telep qilghan. Gherb taratqulirining xewerliride, xitay bilen soda urushi qilishtin saqlinish zörür bolsimu, emma sana'etleshken yette döletning xitayning “Naheq soda emeliyiti” ge qarshi özlirining sana'et menpe'etini qoghdishining zörürlüki qeyt qilinmaqta.

Roytérs agéntliqining bildürüshiche, italiye iqtisad ministiri gi'orgéti, yawropa ittipaqining amérikani örnek élip italiye mallirigha tamozhna béjini östürüshining peqet waqit mesilisi bolup qalghanliqini éytqan. Xewerlerde, maliye ministirlirining ukra'inagha qerz bérishte rusiyening yawropa we amérikadiki tonglitilghan mal-mülkige zakalet qoyushni muzakire qilishi, amérika maliye ministiri qerz pulning 50 milyard dollar etrapida bolushi mumkinlikini bildürgen bolsimu, emma qerz sommisining téxi békitilmigenliki qeyt qilinmaqta.