Xitay dewatqan "A'ilisi namrat" 103 ming 700 oqughuchi diqqet qozghidi

Muxbirimiz irade
2019-11-25
Élxet
Pikir
Share
Print

Shinjang géziti 24-noyabir küni tarqatqan bir xewiride, Uyghur élide nöwette namrat balilargha yardem bérish meqsiti bilen teshkillen'gen "Ümid qurulushi" boyiche a'ilisi namrat 103 ming 700 oqughuchigha yardem bérilgenlikini bayan qilghan.

Xewerde, "Ümid qurulushi boyiche, 517 ümid bashlan'ghuch mektipi, ümid yeslisi, bir ümid doxturxanisi yardem bérilip quruldi؛ a'ilisi namrat jem'iy 103 ming 700 oqughuchigha yardem bérildi" déyilgen.

2017‏-Yilidin tartip Uyghur élide keng kölemlik tutqun herikiti bashlighandin buyan sanaqsiz a'ililer weyran bolghan, nurghun balilar qaranchuqsiz qalghandin kéyin, xitay hökümitining bu balilarni "Perishtiler yeslisi" qatarliq chirayliq isimlar qoyulghan balilar lagérlirigha yighiwalghanliqi ashkarilan'ghan. Biraq bu balilarning omumiy sanigha da'ir bir melumat yoq idi.

Dunya Uyghur qurultiyi bayanatchisi dilshat rishitning qarishiche, yuqiridiki xewerde tilgha élin'ghan 103 ming 700 neper "Namrat bala" ning del ata-aniliri lagérgha kirip ketkenliktin iqtisadiy qiyinchiliqta qalghan yaki qaranchuqsiz qalghan balilar bolush éhtimalliqi yuqiri iken.

"Shinjang géziti" xewiride yene, "Ümid qurulushi aptonom rayonimizning emeliy ehwaligha birleshtürüp herqaysi az sanliq millet yash-ösmürlirining dölet ortaq til-yéziqini téz igilep, xaraktér tawlishi, sapasini östürüshi, medeniylikke warisliq qilishigha yardem berdi" dégen.

Amérikadiki "Uyghur kishilik hoquq qurulushi" 20-noyabir dunya balilar küni munasiwiti bilen bayanat élan qilip, xelq'ara jem'iyetni xitay hökümitining Uyghur balilirini ata-anisidin ayriwétish siyasitige xatime bérish üchün heriketke ötüshke ündigen. Bayanatta, xitay hökümitining Uyghur balilirini xitay medeniyiti boyiche terbiyelep "Medeniyet qirghinchiliqi" yürgüzüwatqanliqi tekitlen'gen.

Toluq bet