Xitay hökümiti Uyghurning nan medeniyitini xitaychilashturmaqta

Uyghurlar elmisaqtin tartip nanni muqeddes bilip, uni ulughlap kelgen bir xelq. Halbuki, yéqindin buyan xitay hökümiti türlük usullarni qollinip, Uyghurlarning tarixtin buyan dawamliship kéliwatqan nan medeniyitini xitaylashturushqa urunmaqta.

Yéqinda xitayning “Xewerler” torida qeshqer wilayitining yeken nahiyeside eng chong nan zawutining qurulghanliqi heqqide bir süretlik xewer élan qilin'ghan. Xewerdin melum bolushiche, nan zawutining échilish murasimigha Uyghur diyaridiki her derijilik hökümet organliridin peqet xitay xadimlarla qatnashqan we zawutni ziyaret qilghan. Xewerdiki muhim nuqtilarning biri xitay da'iriliri murasimgha qatnashqan Uyghur qizlirini pütünley xitayning en'eniwi bayram kiyimlirini kiyishke teshkilligen.

Xewerde déyilishiche, xitay da'iriliri nan zawuti qurup, herxil shekillerdiki, hetta somka shekillik nanlarni yéqip chiqirip, bazargha salghan.

Muhajirettiki analizchilar bu heqte pikir yürgüzüp, Uyghurlarning ezeldin tartip ulughlap kéliwatqan nan medeniyiti, hetta nanning yerge chüshüp ketken uwiqinimu dessimeydighan aditi nöwette xitay medeniyitining xirisigha duch kelmekte. Bu xitay hökümitining ochuq-ashkara haldiki medeniyet qirghinchiliqidin bashqa nerse emes, dep qarimaqta.