Amérika awam palata re'isi pélosi: "Xitayning kishilik hoquq depsendichiliki jawabkarliqqa tartilishi kérek"

Muxbirimiz erkin
2020-01-29
Élxet
Pikir
Share
Print

Amérika awam palata re'isi nensi pélosi 28‏-yanwar küni awam palatasining yighinida nutuq sözlep, xitayning Uyghur qatarliq xelqlerni nishan qilghan kishilik hoquqni depsen qilish qilmishining jawabkarliqqa tartilishi kéreklikini bildürgen.

Nensi pélosi shu küni awam palatasining 4331‏-nomurluq "2020-Yilliq tibet siyasiti we tibetni qollash qanun layihesi" awazgha qoyulghanda bu sözlerni qilghan. Mezkur qanun layihisi 28‏-yanwar 392 awazning qollishi bilen maqullan'ghan bolup, uningda dalay lama ölse uning izbasarini tibetlerning özi saylash, uninggha qol tiqqan xitay emeldarlirigha émbargo yürgüzüsh qatarliqlar telep qilin'ghanidi. Nensi pélosi awam palatasida qilghan sözide mundaq dégen: "Amérika dölet mejlisi xitayning kishilik hoquqni xorlash jehettiki nurghun qilmishlirini, jümlidin uning Uyghurlarni öz ichige alghan nurghun xelqlerni nishan'gha élishtek epsuslinarliq qilmishlirini jawabkarliqqa tartishi kérek. Buningda hazir mikkol we rubi'o ependilerning ortaq tirishchanliqi bizning aktip qollishimizgha ériship keldi. Uyghurlar mejburiy qisirlashturush, keng kölemlik tutqun qilishtek qorqunchluq kishilik hoquq depsendichilikige uchrimaqta. Milyonlighan kishining teqiblinishidek bu ehwal biz sözlewatqan hazirning özide yüz bermekte".

U, bu sözlerni dunya taratqulirining diqqiti xitayning wuxen shehiride tarqalghan "Korona wirusi" gha merkezliship, lagérlar mesilisi bir az bésiqip qalghandek bir ehwalda tekitligen. Nensi pélosi yene Uyghur aptonom rayonluq partkom sékrétari chén chüen'goni tilgha élip: "Biz shunimu bilimiz, Uyghur aptonom rayonining sékrétari (chén chüen'go) burun tibet aptonom rayonining 1-qol mes'uli bolghan. U bek zalim bolghachqa atalmish mezkur aptonom rayon'gha ewetilip, mukapatlan'ghan boldi" dégen. Nensi pélosi "Uyghur kishilik hoquq qanun layihesi" ni qollap, uning mezmunigha bezi küchlük maddilarni qoshushni telep qilghan siyasiyonlarning biridur. Mezkur qanun layihesi ötken yili awam palatasida maqullinip, kéngesh palatasigha sunulghanidi.

Toluq bet