Нәнси пелуси: «хитайниң уйғурларға селиватқан зулуми дуняниң виҗданиға қилинған хиристур»

Мухбиримиз әркин
2019-06-07
Елхәт
Пикир
Share
Принт

Америка авам палатасиниң рәиси нәнси пелуси ханим 6‏-июн күни баянат елан қилип, «уйғур хәлқиниң хитайниң қолида изчил зулумға учрап келиши дуняниң виҗданиға қилинған бир хирис» дәп көрсәткән.

У һазирға қәдәр уйғур мәсилисидә хитайни қаттиқ тәнқид қилған американиң муавин президенти майк пәнсдин қалса дәриҗиси әң юқири иккичи‏ бир сиясәтчидур.

Нәнси пелуси юқириқи сөзләрни дуня уйғур қурултийи вә америка уйғур кишилик һоқуқ қурулушиниң 6‏-июн күни вашингтонда өткүзүлгән «хитайдики явузлуқларға қарши турайли: уйғур киризисигә қарита йәршари характерлик инкас‏‏» намлиқ йиғиниға әвәткән баянатида тәкитлигән. У мундақ дегән: «уйғур хәлқиниң хитайниң қолида изчил зулумға учрап келиши дуняниң виҗданиға қилинған бир хиристур. Авам палатасиниң һәр икки партийәсидин болған әзалири дуня уйғур қурултийи вә уйғур кишилик һоқуқ қурулушиниң җәсур оғул-қизлириға шуниңдәк уйғур хәлқигә лайиқ болған демократийә вә әркинлик үчүн күрәш қиливатқан барлиқ кишиләргә еһтирам билдүриду. Бизниң қәлбимиз вә зеһнимиз диний җазалашқа учраватқан, җүмлидин бу һәптә ахирлашқан рамзанда роза тутуши чәкләнгән уйғур хәлқи билән биргә.»

Нәнси пелусиниң илгири сүрүшичә, 1989‏-йилидики «тйәнәнмен вәқәси» дә өлгән әркинлик җәңчилиригә болған әң чоң еһтирам, уларниң демократийә истикини «уйғур хәлқи, тибәт хәлқи, хоңкоң хәлқи вә шундақла хитай һакимийитиниң зулуми һәм бастурушиға учраватқан хәлқләр үчүн изчил алға йетәкләп елип меңиш» икән. У «биз бу һәптә тйәнәнмен қирғинчилиқидики явузлуқниң 30 йиллиқини хатирилидуқ. Дуня җамаити тйәнәнмен әвладлириниң әркинлик ғайисини әмәлгә ашурғучиларниң тәрипидә туруши керәк» дегән.

Д у қ ниң «хитайдики явузлуқларға қарши турайли: уйғур киризисигә қарита йәршари характерлик инкас‏‏»» намлиқ йиғини вашингтонда өткүзүлгән «уйғур һәптилики» паалийитиниң муһим бир қисми болуп, мәзкур паалийәт «тйәнәнмен қирғинчилиқи» ниң 30 йиллиқиға тоғра кәлгән иди.

Пикирләр (0)
Share
Толуқ бәт