Nensi pélusi: "Xitayning Uyghurlargha séliwatqan zulumi dunyaning wijdanigha qilin'ghan xiristur"

Muxbirimiz erkin
2019-06-07
Share

Amérika awam palatasining re'isi nensi pélusi xanim 6‏-iyun küni bayanat élan qilip, "Uyghur xelqining xitayning qolida izchil zulumgha uchrap kélishi dunyaning wijdanigha qilin'ghan bir xiris" dep körsetken.

U hazirgha qeder Uyghur mesiliside xitayni qattiq tenqid qilghan amérikaning mu'awin prézidénti mayk pensdin qalsa derijisi eng yuqiri ikkichi‏ bir siyasetchidur.

Nensi pélusi yuqiriqi sözlerni dunya Uyghur qurultiyi we amérika Uyghur kishilik hoquq qurulushining 6‏-iyun küni washin'gtonda ötküzülgen "Xitaydiki yawuzluqlargha qarshi turayli: Uyghur kirizisige qarita yershari xaraktérlik inkas‏‏" namliq yighinigha ewetken bayanatida tekitligen. U mundaq dégen: "Uyghur xelqining xitayning qolida izchil zulumgha uchrap kélishi dunyaning wijdanigha qilin'ghan bir xiristur. Awam palatasining her ikki partiyesidin bolghan ezaliri dunya Uyghur qurultiyi we Uyghur kishilik hoquq qurulushining jesur oghul-qizlirigha shuningdek Uyghur xelqige layiq bolghan démokratiye we erkinlik üchün küresh qiliwatqan barliq kishilerge éhtiram bildüridu. Bizning qelbimiz we zéhnimiz diniy jazalashqa uchrawatqan, jümlidin bu hepte axirlashqan ramzanda roza tutushi cheklen'gen Uyghur xelqi bilen birge."

Nensi pélusining ilgiri sürüshiche, 1989‏-yilidiki "Tyen'enmén weqesi" de ölgen erkinlik jengchilirige bolghan eng chong éhtiram, ularning démokratiye istikini "Uyghur xelqi, tibet xelqi, xongkong xelqi we shundaqla xitay hakimiyitining zulumi hem basturushigha uchrawatqan xelqler üchün izchil algha yéteklep élip méngish" iken. U "Biz bu hepte tyen'enmén qirghinchiliqidiki yawuzluqning 30 yilliqini xatiriliduq. Dunya jama'iti tyen'enmén ewladlirining erkinlik ghayisini emelge ashurghuchilarning teripide turushi kérek" dégen.

D u q ning "Xitaydiki yawuzluqlargha qarshi turayli: Uyghur kirizisige qarita yershari xaraktérlik inkas‏‏"" namliq yighini washin'gtonda ötküzülgen "Uyghur heptiliki" pa'aliyitining muhim bir qismi bolup, mezkur pa'aliyet "Tyen'enmén qirghinchiliqi" ning 30 yilliqigha toghra kelgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.