Nensiy pélosining ziyaritidin achchiqlan'ghan xitay teywen etrapida herbiy manéwir bashliwetken

Muxbirimiz irade
2022.08.04
Share on WhatsApp
Share on WhatsApp

Amérika awam palata re'isi nensiy pélosi teywendiki ziyaritini ayaghlashturup bir kündin kéyin xitay teywen'ge yéqin déngiz rayonlirida herbiy manéwirini bashliwetken.

S n n téléwiziyesining xewiridin qarighanda, xitay bu herbiy manéwirida teywenning shimali, jenubi we sherqide kem dégende 11 bashqurulidighan bomba atqan bolup, bu bombilarning 5 danisi yaponiyege tewe déngiz rayonlirigha chüshken. Biraq, xitay armiyesi “Bashqurulidighan bombilarning hemmisi nishan'gha del zerbe berdi” dep jakarlighan.

Yaponiye terep xitay hökümitige naraziliq bildürgen bolup, yaponiyening dölet mudapi'e ministiri nobu'o kishi sözide “Bu bizning dölet bixeterlikimiz we puqralirimizning bixeterlikige munasiwetlik éghir mesile” dégen.

Halbuki xewerde éytilishiche, xitay tashqi ishlar bayanatchisi xu'a chünying manéwirdin bir kün burun yeni 3-awghust charshenbe künidiki qilghan sözide béyjingning u déngiz rayonini yaponiyege tewe dep étirap qilmaydighanliqini éytqan iken.

Teywen prézidénti sey yingwén bolsa 4-awghust, peyshenbe küni kechte sin arqiliq nutuq sözligende xitayning herbiy manéwirini “Teywen üchünla emes, xelq'ara jem'iyet üchünmu bir mes'uliyetsizlik” dep atighan.

Prézidént sey yingwén xanim bayanatida mundaq dégen: “Xitay bügün teywen etrapidiki rayonlarda herbiy manéwir qiliwatidu. Biz béyjingni eqil bilen heriket qilishqa we özini tutuwélishqa chaqirimiz. Teywen toqunushni keskinleshtürmeydu, emma biz igilik hoquqimizni, bixeterlikimizni we démokratiyemizni qet'iy qoghdaymiz”.

S n n téléwiziyesining xewiride éytilishiche, gerche hazirche bu manéwirning bir herbiy toqunushqa aylinip kétish éhtimalliqi intayin az bolsimu, emma weziyetning qash bilen kirpik arisida özgirish mumkinchiliki bar iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.