NATO Рәһбәрлири хитайни "дунявий хәвпсизликкә хирис пәйда қилмақта" дәп җакарлиди

Мухбиримиз әзиз
2021-06-22
Share

Баш шитаби белгийәниң берюссел шәһридики шималий атлантик әһди тәшкилати (NATO) ниң рәһбәрлири 21-июндики йиғиндин кейин язма баянат елан қилип: "хитайниң көзләватқанлири вә қиливатқанлири униң қанун арқилиқ идарә қилинидиған хәлқара тәртипләр вә бизниң иттипақдашлиримиз үчүн системилиқ хирисларни пәйда қилмақта" дәп көрсәтти.

Америка президенти җов байден әнглийәдики "йәттә дөләт башлиқлири йиғини" (G7) дин кейин NATO йиғиниға иштирак қилған һәмдә иттипақдашлар билән хитай һәққидики мәсилиләрни муһакимә қилған. Муһакимә йиғини җәрянида у иттипақдашларни уйғурлар дуч келиватқан сиясий бастурушлар вә зор көләмлик мәҗбурий әмгәк һәққидә агаһландуруп: "иттипақдашлиримизниң бу мәсилидә бәзилири башқичә пикирләрдә болуватқан болсиму, әмма омумий пикир йәнила бизни мәмнун қилиду," дегән.

Бу қетимқи NATO йиғиниға қатнашқан дөләтләрдин франсийә, германийә қатарлиқ бир қисим дөләтләр хитай билән болған иқтисадий муамилииси түпәйлидин хитай һөкүмитини "дуня хәвпсизлики үчүн тәһдит" дәп җакарлашни "сәл чекидин ашуривәткәнлик" дәп қарайдиғанлиқини билдүргән.

Хәвәрдә ейтилишичә, бу қетимқи йиғинда америка президенти җов байден американиң иттипақдашлири билән, җүмлидин балтиқ дөләтлири билән хитай мәсилисидә кәң-кушадә сөһбәттә болған. Шуниңдәк NATO ниң баш секретари җенс столтенберг билән иттипақдашлардин бири һуҗумға учриса, қалғанлири тездин коллектип инкас қайтуруш мәсилиси һәққидә ортақ чүшәнчә һасил қилған. Хәвәрдин мәлум болушичә, 23-июн күни җов байден росийә президенти виладимир путин билән учришидикән һәмдә бихәтәрлик мәсилиси бойичә сөһбәтлишидикән. Нөвәттә бәзиләр униң "йәттә дөләт башлиқлири" вә NATO рәһбәрлири билән учришишини путин билән болидиған сөһбәтниң алдиға қоюши тоғрисида һәр хил пәрәзләрдә болмақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт