«NBA» Ниң уйғур елидики мәшиқ базилирини қайта ечиш мумкинчилики тәнқидкә учриди

Мухбиримиз ирадә
2020-08-06
Елхәт
Пикир
Share
Принт

Америка кеңәш палата әзаси марша бләкберн вә марко рубийолар америка васкетбол уюшмиси «NBA» ға уйғур елидики мәшиқ базилири вә хитай һөкүмити билән болған мунасивити һәққидә изаһат беришини тәләп қилип мәктуп йоллиған.

Марша бләкберн ««NBA»» ниң уйғур елидә мәшиқ базилирини тақаш һәққидә изчил бесим ишлитип келиватқан америка кеңәш палата әзаси иди. У илгириму көп қетим «NBA» ға бу һәқтә мәктуп язғандин кейин, нәтиҗидә, васкетбол уюшмиси «NBA» ниң муавин комиссари марк татум 21-июл күни кеңәш палата әзаси бләкберинға җаваб хети язған. Татум хетидә «NBA шинҗаңдики васкетбол академийәси билән бир йилдин артуқ вақиттин бери һечқандақ алақә қилмиди. Бизниң мунасивитимизгә хатимә берилди» дегәнни илгири сүргәниди.

Һалбуки йеқинда американиң «ESPN» телевизийәси бу һәқтә әп барған тәкшүрүш хәвиридә, «NBA» ниң уйғур елидики мәшиқ базилирини йәнә қайта ечиш ойи барлиқини ашкарилиған. Бу хәвәрдә йәнә, бу мәшиқ базилирида оқуғучиларниң хитай оқутқучилири тәрипидин қаттиқ хорлинидиғанлиқи, уйғур елидики америкалиқ васкетбол оқутқучилириниң болса йәрлик сақчиларниң назарәт қилишиға учриғанлиқидәк әһвалларму ашкариланғаниди.

Марша бләкберн 6-авғуст күни тивиттирда қилған сөзидә юқиридики бу зиддийәтлик сөзләрни тилға елип, «NBA» башлиқи адам силверни дәрһал буниңға изаһат беришкә чақирди. Шундақла марко рубийо вә өзиниң бу һәқтә уларға рәсмий мәктуп йоллиғанлиқини җакарлиди.

Марша бләкберн ханим йәнә, америка һөкүмити хитай компартийәсиниң тәсирини йоқитиш вә униң кишилик һоқуқ дәпсәндичиликигә қарши турушқа тиришиватқан бир шараитта америкадики һәрсаһәниң җүмлидин тиҗарәт ширкәтлири болсун, мәйли тәнтәрбийә яки көңүл ечиш саһәси болсун һәммисиниң хитай һөкүмитини кишилик һоқуқни дәпсәндә қилғанлиқи, әқлий мүлк оғрилиқи билән шуғулланғанлиқидәк қилмишлири үчүн җазаға тартишта өз мәсулийитини ада қилиши керәкликини тәкитлиди.

Пикирләр (0)
Share
Толуқ бәт